Справа Мальцава. Абвінавачванне следства развалілася - пракурор рыхтуе новае

Судовае следства ў справе генеральнага дырэктара ААТ «Барысаўдрэў» нечакана дасягнула кропкі вяртання да пачатку працэсу.

Ініцыятарам гэтага дзейства выступіў бок абвінавачвання...

У мінулую пятніцу падчас судовага разбіральніцтва былі вывучаныя рэчавыя доказы ў справе - каля дзясятка кардонных каробак, у якія следства змясціла кілаграмы дакументаў, канфіскаваных падчас шматлікіх ператрусаў, пішуць «Беларускія навіны».

Сёння, 2 снежня, меркавалася дапытаць сведак, якія па розных прычынах не змаглі з'явіцца ў суд. У іх ліку - былы міністр архітэктуры і будаўніцтва Анатоль Нічкасаў (цяпер амбасадар у Казахстане), першы намеснік прэм'ер-міністра Уладзімір Сямашка і былы гендырэктар ААТ «Барысаўдрэў» Уладзімір Кухто.

Нічкасаў і Сямашка, як было агучана ў судзе, не змаглі з'явіцца «праз занятасць». Пра месца знаходжання Кухто дакладна невядома: кажуць, ён у Расеі, а ў Беларусі супраць яго распачатая крымінальная справа за «скажэнне звестак дзяржаўнай статыстычнай справаздачнасці».

У якасці паказанняў сведак, якія не з’явіліся, былі зачытаныя пратаколы іх допытаў падчас папярэдняга следства.

Судовае следства, можна сказаць, набліжалася да свайго завяршэння. Чакалася, што вось-вось пачнуцца судовыя спрэчкі, а там і да прысуду рукой падаць. І вось пасля невялікага перапынку, абвешчанага суддзёй Валянцінам Вердышам, дзяржаўны абвінаваўца Алена Філовіч нечакана заявіла хадайніцтва:

«У сувязі з выстаўленнем новага абвінавачвання, якое істотна адрозніваецца ад раней выстаўленага, прашу абвясціць перапынак на 10 дзён для складання новай пастановы аб прыцягненні ў якасці абвінавачанага».

Суддзя хадайніцтва задаволіў. Новае абвінавачванне Мальцаву будзе выстаўленае 8 снежня. Пасля азнаямлення з ім гендырэктара зноў дапытаюць.

Якім будзе новае абвінавачанне, акрамя пракурора, напэўна, ніхто не ведае. Адвакат абвінавачанага Зміцер Гарачка ад каментароў устрымаўся, заўважыўшы, што пасля атрымання на рукі новай абвінаваўчай пастановы яму і яго кліенту спатрэбіцца час на вывучэнне гэтага дакумента.

У чым ужо няма сумневаў, дык гэта ў тым, што за час працэсу, які пачаўся 23 верасня, у дзяржаўнага абвінаваўцы склалася свая кропка гледжання на дзеянні абвінавачанага Мальцава падчас выканання ім сваіх службовых абавязкаў у мадэрнізацыі прадпрыемства.

Хутчэй за ўсё, пазіцыя дзяржабвінаваўцы будзе кардынальна адрознівацца ад высноў папярэдняга следства.

У які вось толькі бок? Пра гэта стане вядома ў панядзелак.

Нагадаем, Уладзімір Мальцаў быў затрыманы і заключаны пад варту 11 сакавіка гэтага года. Следствам яму было выстаўленае абвінавачванне паводле ч. 3 арт. 424 КК (злоўжыванне ўладай або службовымі паўнамоцтвамі), якое прадугледжвае пакаранне ад 3 да 10 гадоў з канфіскацыяй маёмасці. Шкода ж, паводле ацэнак следства, ад супрацьзаконных дзеянняў гендырэктара склала каля 18 млрд рублёў.

У абвінавачванні два «недасканалых» эпізоды. Першы прыпадае на рэалізацыю двух кантрактаў з турэцкай кампаніяй Bersey. Нібыта Мальцаў пераплаціў туркам 953000 еўра (больш за 12 млрд руб.). Другі эпізод тычыцца мадэрнізацыі запалкавай вытворчасці, таксама з нанясеннем шкоды па віне Мальцава.

Асабістай матэрыяльнай зацікаўленасці абвінавачанага следчая група (пяць следчых і некалькі аператыўных супрацоўнікаў міліцыі) у гэтай справе не знайшла. Сваю віну кіраўнік не прызнаў.