Берасцейскага гімназіста падазраюць у несапраўдным мініраванні школы

У ілжывым паведамленні аб мініраванні сярэдняй школы №23 горада Берасця падазраецца навучэнец адной з гімназій абласнога цэнтра.

Пра гэта паведаміў начальнік аддзялення інфармацыі і грамадскіх сувязей УУС Берасцейскага аблвыканкама Сяргей Дучэнка, паведамляе БелТА.

Падчас праверкі паводле факта, які адбыўся напярэдадні інцыдэнту, устаноўлена, што званок аб мініраванні школы паступіў ад навучэнца гімназіі 2002 нараджэння. Праваахоўнікі працягваюць высвятляць усе акалічнасці здарэння.

Напомнім, 14 лютага а 15.35 у Маскоўскі РАУС Берасця паступіла паведамленне аб мініраванні СШ №23 па вуліцы Арлоўскай. Інфармацыя зыходзіла ад невядомага, які патэлефанаваў на адмысловую лінію па нумары 112. На месца здарэння прыбылі сапёрна-піратэхнічная і следча-аператыўная групы, а таксама супрацоўнікі КДБ, МНС, хуткай медыцынскай дапамогі. Установа адукацыі і прылеглая тэрыторыя былі ачэпленыя, а дзеці і дарослыя, якія знаходзіліся ў школе, пакінулі будынак. Усяго было эвакуявана 220 чалавек, у тым ліку 190 вучняў. Выбуховага прыстасавання сапёры не знайшлі.