СК просяць пакараць бобрскага чыноўніка за паламаную «Пагоню»

Выканаўца абавязкаў старшыні Бобрскуага сельсавета Загорскі парушыў адразу некалькі артыкулаў Крымінальнага кодэкса РБ.

Старшыня Беларускага добраахвотнага таварыства аховы помнікаў гісторыі і культуры Антон Астаповіч звярнуўся ва ўправу СК Менскай вобласці з просьбай распачаць крымінальную справу ў дачыненні да яго, паведамляе БелаПАН.

Падчас святкавання Дня Волі 25 сакавіка ў гарадскім пасёлку Бобр мясцовы мастак Алесь Пушкін кожны год на цэнтральнай плошчы піша карціну «Свабода». Працягваў працу ён і ў гэтым годзе. Да яго падышоў в.а. старшыні сельсавета Уладзімір Загорскі і пачаў адбіраць карціну. Калі яму гэта не ўдалося, ён сарваў прымацаваны да карціны герб «Пагоня», разламаў яго і сышоў. Усё гэта бачылі журналісты, якія пазней і выклалі відэа ў інтэрнэт.

Астаповіч мяркуе, што Загорскі парушыў адразу некалькі артыкулаў Крымінальнага кодэксу РБ: апаганьванне гісторыка-культурнай каштоўнасці, злоўжыванне ўладай або службовымі паўнамоцтвамі і перавышэнне ўлады або службовых паўнамоцтваў.

На наступны дзень здарэння Астаповіч звярнуўся ў Следчы камітэт з просьбай правесці праверку з наступным распачынаннем справы.

У звароце Астаповіч падкрэсліў, што «герб «Пагоня»- нематэрыяльная гісторыка-культурная каштоўнасць, якая ёсць у Дзяржаўным спісе гісторыка-культурных каштоўнасцяў». Ён спасылаецца на асобныя артыкулы закона «Аб ахове гісторыка-культурнай спадчыны», якія абвяшчаюць, што «стварэнне перашкод існаванню, развіццю і перадачы нашчадкам нематэрыяльных гісторыка-культурных каштоўнасцяў» забаронена, а таксама абавязваюць мясцовыя саветы дэпутатаў прыяць «правядзенню мерапрыемстваў для захавання і аднаўленню гісторыка-культурных каштоўнасцяў».