Генэральны сакратар NATO: Мы заклікаем Расею адвесці свае войскі на базы (Відэа)
60- 6.03.2014, 20:22
- 72,709
Паводзіны Расеі нясуць пагрозу еўрапейскай бяспецы.
Генэральны сакратар NATO Андэрс Фог Расмусэн выказаўся ў падтрымку накіравання міжнародных назіральнікаў у Аўтаномную Рэспубліку Крым для мірнага выйсця з крызіснай сітуацыі.
Пра гэта ён заявіў на прэс-канферэнцыі ў чацвер пасля сустрэчы з прэм'ер-міністрам Украіны Арсеніем Яцэнюком, паведамляе Украінская праўда.
"Дазвольце мне падкрэсліць, што адзіны шлях наперад - гэта палітычнае развязанне. Мы падтрымліваем міжнародныя намаганні, накіраваныя на пошук гэтага шляху з дапамогай накіравання міжнародных назіральнікаў і мірнага дыялогу", - заявіў Расмусэн.
Генэральны сакратар зноў заявіў аб падтрымцы з боку Альянсу тэрытарыяльнай цэласнасці, суверэнітэту Украіны і асноватворных прынцыпаў міжнароднага права.
"Гаворка ідзе не толькі пра Украіну. Гэты крызіс мае сур'ёзныя наступствы для бяспекі і стабільнасці ў Еўраатлантычным рэгіёне агулам. Мы стаім перад абліччам найбольшай пагрозы еўрапейскай бяспецы з часоў заканчэння халоднай вайны", - упэўнены ён.
Расмусэн таксама паведаміў аб намеры NATO інтэнсіфікаваць партнёрства шляхам умацавання супрацоўніцтва з мэтай падтрымкі дэмакратычных рэформаў.
"Мы будзем нарошчваць нашае ўзаемадзеянне з палітычным і вайсковым украінскім кіраўніцтвам. Мы актывізуем нашы намаганні для развіцця патэнцыялу ўкраінскіх вайскоўцаў, у тым ліку ўключаючы супольную падрыхтоўку і правядзенне вучэнняў", - пазначыў планы Альянсу ў сфэры супрацоўніцтва з Украінай генэральны сакратар.
Пры гэтым ён асабліва адзначыў "вялікую стрыманасць, якую выявілі ўкраінскія Узброеныя сілы". "Халодная галава - гэта ключ да дээскалацыі", растлумачыў ён.
У гэтай сувязі Расмусэн заклікаў Расею выканаць свае міжнародныя абавязанні і спыніць вайсковую эскалацыю ў Крыме.
"Мы заклікаем Расею адвесці свае войскі на базы і ўстрымлівацца ад усялякага ўмяшання ва ўсякай іншай частцы Украіны. У 21-м стагоддзі не павінна быць ніякіх спроб правядзення новых ліній на карце Еўропы", - упэўнены ён.
Са слоў генэральнага сакратара NATO, недапушчальна праводзіць новыя лініі падзелу ў Еўропе ў 21-м стагоддзі.