«Барселона» выкупіла дыскваліфікаванага за ўкус Суарэса ў «Ліверпуля»
1- 11.07.2014, 20:16
- 5,884
Каталонская «Барселона» пацвердзіла пераход у сваю каманду нападніка «Ліверпуля» і зборнай Уругвая Луіса Суарэса.
Пра гэта паведамляе афіцыйны сайт «сіне-гранатавых», піша Lenta.ru.
Сцвярджаецца, што на наступным тыдні 27-гадовы форвард пройдзе медыцынскае абследаванне і падпіша з новым клубам пяцігадовы кантракт, пасля чаго будзе прадстаўлены публіцы на стадыёне «Камп Ноў».
Сума трансфэру і заробак Суарэса не выдаюцца. Паводле інфармацыі прэсы, «Барселона» заплаціць за трансфэр уругвайца 75 мільёнаў фунтаў стэрлінгаў. Менавіта такая сума адступных была прапісаная ў кантракце футбаліста з «Ліверпулем».
Выйсці на поле ў складзе новай каманды Суарэс зможа толькі ў кастрычніку, калі скончыцца тэрмін яго дыскваліфікацыі за ўкус абаронцы зборнай Італіі Джорджа К'еліні. Такое пакаранне гульцу вынесла Міжнародная федэрацыя футбола (ФІФА). Нападаючы спрабаваў абскардзіць гэтую пастанову, але апеляцыя была адхіленая.
Фота: Getty Images