Турысты з Беларусі аддаюць перавагу Балгарыі перад акупаваным Крымам

Сярод замежных турыстаў у Балгарыі павялічылася колькасць грамадзян Беларусі.

Бургаская рэгіянальная турыстычная палата паведаміла аб павелічэнні на 8,8% колькасці замежных турыстаў, адпачылых у чэрвені сёлета на ўзбярэжжы Чорнага мора ў параўнанні з аналагічным перыядам 2013 года. Гэта адбылося, нягледзячы на меркаваны спад дзеля Сусветнага чэмпіянату ў футболе, проліўняў і крызісу ва Украіне. Агулам у мінулым месяцы на курортах Бургаскага рэгіёну адпачыла 296178 замежнікаў, пішуць «Новости Болгарии».

Колькасць турыстаў з Беларусі вырасла на 44%, з Польшчы - на 23%, з Даніі - на 22%, з Расеі - на 17%. Акрамя таго, расце колькасць замежнікаў - уласнікаў жытла ў Балгарыі. У Нэсэбры зарэгістраваныя 36 тысяч сем'яў з Расеі, якія набылі дамы і апартамэнты. Таксама рост цікавасці да балгарскай нерухомасці на ўзбярэжжы Чорнага мора адзначаны ў грамадзян Украіны, Беларусі і Казахстана. У той жа час, брокеры незадаволеныя малой колькасцю ўгод куплі-продажу жылля з удзелам ангельцаў.

Але ўсё ж, як адзначае Бургаская рэгіянальная турыстычная палата, агульная сітуацыя не такая добрая, як хацелася б. Так, колькасць турыстаў з Нідэрландаў знізілася на 73%, Фінляндыі - на 40,5%, Швайцарыі - на 31%, Эстоніі - на 29%, Швэцыі - на 26%, Украіны - на 22%.

Колькасць адпачывальнікаў з Францыі і Ірландыі засталося на ранейшым узроўні ў параўнанні з мінулым годам.