Лідэр «Воплі Відоплясова» даў прытулак у сваім доме крымска-татарскай сям'і
1- 2.07.2014, 10:31
- 7,010
Алег Скрыпка пасяліў у сваім загарадным доме перасяленцаў з Крыму.
«Гэта сям'я крымскіх татар: муж, жонка і чацвёра дзяцей. З імі я пазнаёміўся праз сайт Крым-SOS, які дапамагае знайсці жыллё бежанцам. Я шчыльна супрацоўнічаю з крымскімі татарамі са свайго фестывалю «КраÏна мрiй», бо ў нас будзе крымска-татарская сцэна, на якой выступяць іх творчыя калектывы», - распавёў лідэр гурта «Воплі Відоплясова» выданню «Вести».
Паводле інфармацыі выдання, загарадны дом Скрыпкі, знаходзіцца на беразе Кіеўскага мора. Артыст дабудоўвае яго ўжо некалькі гадоў. На дзялянцы ў 30 сотак зямлі размяшчаецца велізарны агарод, сад, трохпавярховы дом у этнастылі, а таксама лазня і гараж.
Сам музыка жыве са сваёй жонкай і чатырма дзецьмі ў прыватным доме ў Кіеве.
Паводле звестак Мінсацпалітыкі Украіны, з анэксаванага Крыму ўжо перасялілася 25 тысяч чалавек. Большасць з іх з’ехала ў Вінніцкую, Львоўскую вобласці, а таксама Кіеў.