The Financial Times: Пуцін наўмысна стварае на ўсходзе Украіны «замарожаны канфлікт»

Нягледзячы на падштурхоўванні да прадаўжэння замірэння з боку ЗША і Еўропы, прэзідэнт Украіны прыняў адзіную даступную яму пастанову.

На гэтым тыдні кіеўскія ўлады нарэшце ачысцілі ад барыкад і намётаў палову Хрэшчаціка, аднак на самім Майдане намёты застаюцца: у мінулыя выходныя пратэстоўцы патрабавалі больш рашучых дзеянняў супраць сепаратыстаў на ўсходзе краіны, паведамляюць карэспандэнты The Financial Times Раман Алеарчык і Ніл Баклі (пераклад - Inopressa.ru).

"Гэты ціск дапамагае зразумець, чаму Пётр Парашэнка, адзін з лідэраў пратэстнага руху, абраны ў траўні прэзідэнтам Украіны, у панядзелак, 30 чэрвеня, здзівіў некаторых міжнародных партнёраў, адмовіўшыся падаўжаць 10-дзённае спыненне агню на ўсходзе", - гаворыцца ў артыкуле.

"З непацверджаных паведамленняў, калі Парашэнка аддаваў загад аб поўнамаштабным наступе на сепаратыстаў, яму патэлефанаваў дзяржсакратар ЗША Джон Кэры і заклікаў падоўжыць замірэнне. Аднак публічна ЗША падтрымалі пазіцыю Украіны", - паведамляе FT.

"Нягледзячы на падштурхоўванні да прадаўжэння замірэння з боку ЗША і Еўропы, у канчатковым выніку ён прыняў адзіную даступную яму пастанову", - мяркуе Арсень Каратніцкі з амерыканскага аналітычнага цэнтра Atlantic Council.

"Многія ўкраінцы незадаволеныя няўдалымі спробамі Парашэнкі здушыць паўстанне на ўсходзе і імавернасць таго, што пасля анэксіі Крыма Расеяй у сакавіку гэтага года Украіна можа пазбавіцца кантролю і над іншымі тэрыторыямі. Унутраны палітычны ціск нарастае", - канстатуе карэспандэнты.

"Калі б ён прадоўжыў спыненне агню, яго б, натуральна, палічылі слабым прэзідэнтам, - сказаў карэспандэнтам выдання Васіль Філіпчук з кіеўскага Міжнароднага цэнтра перспектыўных даследаванняў -. Ён страціў бы падтрымку 54% выбарцаў за два-тры тыдні, а затым з лёгкасцю мог бы атрымаць накіраваны супраць яго Майдан".

У Кіеве шырока распаўсюджанае меркаванне, што Пуцін наўмысна спрабуе стварыць на ўсходзе Украіны "замарожаны канфлікт", каб потым гадамі выкарыстоўваць яго ў якасці вагара ціску на Кіеў. Паводле слоў украінскага палітолага Вадзіма Карасёва, жорсткая тактыка Парашэнкі закліканая парушыць планы Пуціна.

"Аднак, калі стаўка не пройдзе і ўкраінскія войскі не даб'юцца хуткіх поспехаў у барацьбе з паўстанцамі, палітычны кошт можа быць высокі", - адзначаецца ў артыкуле.

"Калі вайна зацягнецца і колькасць ахвяраў будзе расці, то ўжо салдацкія маці, а не актывісты з Майдана, якія выступаюць за спыненне замірэння, выйдуць да адміністрацыі прэзідэнта, патрабуючы міру і вяртання сыноў дадому", - прадбачыць Карасёў.