16 красавiка 2024, aўторак, 4:27
Падтрымайце
сайт
Сім сім,
Хартыя 97!
Рубрыкі

Дзень салідарнасці з Беларуссю адзначылі ў Пецярбургу

1

Блізу 20 чалавек узялі ўдзел у Дні салідарнасці з грамадзянскай супольнасцю Беларусі, які адбыўся 4 жніўня ў Санкт-Пецярбургу.

Сярод удзельнікаў, як стала вядома charter97.org, былі грамадзяне Расеі і Беларусі, праваабаронцы і студэнты. Арганізатарам мерапрыемства выступілі актывісты Міжнароднага Моладзевага праваабарончага руху.

Вядучы імпрэзы Раман Бояркоў, дацэнт кафедры прыкладной паліталогіі НДУ ВШЭ, удзельнік Міжнароднага Моладзевага праваабарончага руху, распавёў пра гісторыю Дня салідарнасці. Ён нагадаў, што ў гэты дзень, 4 жніўня ў 2011, быў кінуты за краты кіраўнік праваабарончай арганізацыі «Вясна» Алесь Бяляцкі. Нягледзячы на тое, што нядаўна праваабаронца быў выпушчаны на свабоду, сітуацыя з правамі чалавека ў Беларусі застаецца даволі крытычнай.

Беларуская праваабаронца Валерыя Саўчанкава падрабязна распавяла аб сітуацыі з правамі чалавека ў сябе на радзіме. Паводле яе слоў, у краіне парушаюць асноўныя правы чалавека - на жыццё, мітынгі і сходы, свабоду аб'яднанняў, атрыманне і распаўсюд інфармацыі і многія іншыя. Няўрадавыя арганізацыі пазбаўленыя магчымасці легальнай працы. Да сёння за кратамі знаходзіцца 7 палітвязняў, да ўдзельнікаў несанкцыянаваных акцый ужываюцца катаванні. Арганізатары прадэманстравалі зварот Алеся Бяляцкага, а таксама некалькі ролікаў аб парушэнні правоў чалавека ў Беларусі, прымеркаваных да травеньскага Чэмпіянату свету ў хакеі.

Аналізуючы становішча грамадзянскай супольнасці ў Беларусі, шмат хто з удзельнікаў сустрэчы ўбачылі паралелі з сітуацыяй у Расеі. Тут таксама ідзе імклівы наступ на правы чалавека: забароненыя мітынгі і сходы, незалежныя СМІ і няўрадавыя арганізацыі стала зазнаюць жорсткім прыгнёт, зноў пачаліся напады на праваабаронцаў. Тут, як і ў Беларусі, з'явіліся палітвязні. «Расея на мяжы поўнамаштабнай вайны, а падчас вайны ўсе, хто патрабуе выканання сваіх правоў і тыя, хто іх абараняе, могуць быць прыроўненыя да здраднікаў народа і краіны. Цяперашняя палітыка кіраўніцтва Расеі выразнае таму сведчанне. Не выпадкова Пуцін сярод крыніц пагроз для Расеі назваў «інфармацыйныя і камунікацыйныя тэхналогіі», а таксама некамерцыйныя арганізацыі (НКА)», - кажа супрацоўнік адной з праваабарончых арганізацый Пецярбурга Ігар Станкевіч.

«Калі я слухала аповяды аб становішчы ў Беларусі, я думала, што нас гэта не закране. Але калі ў мінулым годзе нашая арганізацыя паводле пастановы суда была закрытая на месяц за адмову выканаць незаконнае патрабаванне пракуратуры - даць усю дакументацыю аб дзейнасці арганізацыі, я зразумела - Беларусь прыйшла і ў Расею. Сітуацыя пагаршаецца з кожным днём. Цяпер я больш уважліва стаўлюся да беларускага досведу. Я разумею, тое, што было ў Беларусі некалькі гадоў таму - гэта нашае заўтра, а, можа быць, ужо сёння», - дзеліцца сваімі ўражаннямі Рыма Шарыфуліна, прэзідэнтка адной з вядомых праваабарончых арганізацый у горадзе «Пецярбургская Эгіда».

Інфармацыя аб сітуацыі ў Беларусі для шматлікіх удзельнікаў была шакавальнай. Усе казалі пра тое, што праваабаронцы дзвюх краін павінны часцей абменьвацца досведам, каб больш эфектыўна абараняць правы грамадзян.

Закончылася сустрэча калектыўнай фатаграфіяй на фоне лагатыпа Дня салідарнасці са словамі класіка беларускай літаратуры Уладзіміра Караткевіча: «Няхітрая справа - трапіць нагой у пракладзены след. Значна цяжэй, але затое дакладней, пракладваць шлях самому».

Напісаць каментар 1

Таксама сачыце за акаўнтамі Charter97.org у сацыяльных сетках