Падатковая - прадпрымальнікам: У снежні вы ўсе запішчыце

Супрацоўнікі падатковай інспекцыі Полацка ўважаюць усіх гандляроў на рынку за «злачынцаў».

19 лістапада эканамічны суд Віцебскай вобласці будзе разглядаць першую справа індывідуальнай прадпрымальніцы з Полацка Маргарыты Рудкоўскай, якой пагражае канфіскацыя даходу і штрафы на суму амаль 40 млн рублёў. Пачатак працэсу а 10.00, на адрасе горад Віцебск, вуліца Праўды, 32, каб. 417.

Судзіць прадпрымальніцу будзе Анатоль Гурэеў, былы работнік падатковай Віцебскай вобласці.

Маргарыта Рудкоўская распавяла «Беларускай праўдзе» гісторыю сваёй ліквідацыі.

- Пачалося з накладных ў 2014 годзе, калі прадпрымальнікі сталі плаціць ўвазны ПДВ. Мы з'ездзілі ў Маскву, набылі тавар у ІП Траецкая. Падатковая інспекцыя падала запыт у Маскву - Траецкая адмаўляецца, што прадавала тавар, нібыта яна займаецца грузаперавозкамі.

Праз паўтара года, калі з Масквы прыйшоў адказ на запыт, у падатковай інспекцыі Полацка знаходзіўся спіс з 26 прадпрымальнікаў, якія закуплялі ў Траецкай тавар. Адказ на запыт прыйшоў у чэрвені, аднак да кастрычніка нас падатковая не чапала.

Адразу пасля «выбараў», 13 кастрычніка, пайшлі праверкі наконт Траецкай.

Мяне бралі на трэці дзень - я ўжо чакала, што за мной прыйдуць. Калі маладыя хлопцы з падатковай выносіла тавар з ралета насупраць, я чула іх размовы: «Я адчуваю сябе, як у пачатку 90-ых. Калі гэтую будзем браць?» - і паказваюць на мяне пальцам. «Давай гэтую будзем браць заўтра, а вы рыхтуйце тару» - непавага, грэбаванне маладзёнаў, што ў сыны мне годныя, выяўлялася нават у размове.

На наступны дзень прыйшлі, спачатку зрабілі кантрольны закуп - я адарвала талон, пералічылі рэшткі. Даход ад Траецкай пазней яны пералічылі: увазны закуп ад Траецкай у мяне быў на 7 мільёнаў, у мяне яны налічылі 30 мільёнаў сто тысяч. Я не ўсё прадала: у мяне двое дзяцей, у мяне ўнучка, муж, уцекачам давала то грошы, то пальчаткі, то абутак, калі прасілі. Падатковая прыстрашыла пералічыць паводле талонаў і налічыць яшчэ большую суму. Я не стала спрачацца...

Пасля такога стаўлення да сябе (нервы не вытрымліваюць напружання) я пастанавіла ліквідавацца. Калі на рынку ў Полацку прыйшлі першыя праверкі з канфіскацыямі, прадпрымальнікі шэсцем пайшлі да начальніцы падатковай інспекцыі, якая заявіла: «Вы ўсе злачынцы, у вас усе накладныя - ліпавыя. Цяпер пойдуць праверкі аб Траецкай, потым пойдзе «Прэстыж», потым - «Камфорт» - запыты ў Маскву ўжо накіраваныя. У снежні вы наогул усё запішчыце». У мяне наступны тавар ідзе на «Камфорт» - дзе гарантыі, што не адмовіцца і «Камфорт»?

Я адчуваю на здароўі, што больш ужо не вытрываю такіх здзекаў, і падала на ліквідацыю: 16 кастрычніка мяне апісвалі, а 19 кастрычніка я падала на ліквідацыю.

Калі яны ў чэрвені ўжо ведалі, што я «злачынец», як заявіла начальніца падатковай інспекцыі, чаму яны дазвалялі нам гандляваць да кастрычніка? Каб забраць большы даход?.. Я прывезла тавару на 7 мільёнаў, мяне аблічылі на 30 мільёнаў 100 тысяч - гэта толькі даход ад Траецкай. Дык чаму б дзяржаве не вярнуць мне ўвазны ПДВ? Чаму яна нажываецца за кошт ліпавых накладных?

- Суд мае намер спагнаць з вас амаль 40 мільёнаў.

- Мне адназначна прысудзяць штраф - ад 20 да 50 базавых адзінак плюс 30 мільёнаў сто тысяч прыбытку і выдаткі суда. Але гэта толькі з мяне.

- А ці шмат прадпрымальнікаў, якіх чакае такая ж доля?

- У спісах падатковай інспекцыі Полацку значыліся 26 чалавек. Але за першыя тры дні, калі я не памыляюся, узялі 12 прадпрымальнікаў. На мяне складалі акты на трэці, апошні дзень, але чамусьці судзіць пастанавілі мяне першай.

Дарэчы, акт на мяне складалі 23 кастрычніка - з гэтага моманту я мела 15 дзён на абскарджанне «прысуду». Аднак ніхто не стаў чакаць заканчэння 15 дзён - маю справу перадалі ў суд, не дачакаўшыся маіх пярэчанняў.

Маргарыта Рудкоўская - не адзіная прадпрымальніца, якая падала на ліквідацыю. Мінімум 12 полацкім ІП пагражаюць штрафы і канфіскацыі, хоць у спісе з Траецкай значыліся 26 прадпрымальнікаў. А наперадзе - рэпрэсіі ў дачыненні да ІП, якія мелі справу з фірмамі «Прэстыж» і «Камфорт».

Лідэр РГА «Пэрспэктыва» Анатоль Шумчанка абураны стаўленнем дзяржавы да беларускіх прадпрымальнікаў:

- Паводзіны падатковых органаў характарызуюцца крайнім цынізмам. Падатковая заўсёды казала: зайшлі ў рэестр і праверылі любую фірму. Прадпрымальнікі не дурні, праверылі: фірма ІП Траецкай была ў рэестры год таму, у 2014 годзе. Атрымліваецца, што беларускія падатковыя органы канфіскоўваюць прыбытак і тавар на той падставе, што на допыце расейская партнёрка сказала, што тавар не яе. Значыць, суб'екты гаспадарання ў Расейскай федэрацыі могуць адмовіцца ад угоды, што дае права кантрольным органам забраць усё ў беларускіх прадпрымальнікаў. Людзі бралі тавар на рынку, накладныя выпісвалі на рынку, пячатка стаіць, подпіс стаіць. Чаму б не разабрацца - хто за гэтым стаіць?

Праз паказанні расейскай прадпрымальніцы дзяржава гатовая знішчыць беларускі бізнэс? Ці можа адбыцца так, каб у РФ праз сведчанні беларускага прадпрымальніка канфіскоўвалі тавар? Магчыма такое? А ў нас праз сведчанні адной расейскай прадпрымальніцы збанкрутавалі цэлую беларускую сям'ю. А на падыходзе - фірмы «Прэстыж», «Камфорт», якія рэальна зарэгістраваныя.

У чым яшчэ цынізм уладаў? Прадпрымальнік увозіць тавар паводле накладных, дзяржава забірае 20% увазнога ПДВ згодна з накладнымі. Калі падатковая кажа, што праверыць фірму так проста, то чаму яна перш чым узяць грошы з прадпрымальніка не можа хутка праверыць фірму? Праверыў, калі ўсё законна - бярэм грошы, і ніякіх пытанняў. У нашым выпадку людзі паказалі накладныя, ПДВ з іх узялі, а потым падатковая яшчэ праверыла і за «фальшывыя» накладныя збанкруціла прадпрымальніка. Як гэта называецца? Прадпрымальнікі кажуць: «З бандытамі было прасцей». Калі хлопчыкі з падатковай прыходзяць на рынак, яны паводзяць сябе вельмі нахабна.