Арыштаваны за забойства Нямцова Дадаеў заявіў аб катаваннях электратокам

Заур Дадаеў заявіў праваабаронцам, што яго катавалі электратокам тры дні, прыкаваўшы да батарэі.

Пра гэта піша расейскае выданне «Новая газета».

Алена Масюк, чалец Савета пры Прэзідэнце РФ развіцця грамадзянскай супольнасці і праў чалавека і сябра Грамадскай назіральнай камісіі Масквы, паведамляе, што разам з калегам Аляксандрам Кулікоўскім наведала падазраваных у забойстве Барыса Нямцова напярэдадні, 14 сакавіка.

«Заур Дадаеў распавёў, што невядомыя трое сутак утрымлівалі яго ў склепе, прыкаваўшы наручнікамі да батарэі. Ужывалі да яго электраток, апраналі на галаву мех. Заявы Дадаева пра гэта не былі належным чынам аформленыя супрацоўнікамі СІЗА і не накіроўваліся для расследавання», - гаворыцца ў матэрыяле.

У прысутнасці супрацоўнікаў СІЗА «Ляфортава» і пад відэазапіс Заур Дадаеў прыняў прапанову Міжрэгіянальнай грамадскай арганізацыі «Камітэт супраць катаванняў» скарыстацца дапамогай іх юрыстаў, каб пачаць крымінальны разгляд паводле фактаў прымененых да яго катаванняў і гвалтоўных дзеянняў.

Барыса Нямцова застрэлілі позна ўвечары 27 лютага на Вялікім Маскварэцкім мосце ў цэнтры Масквы. Паводле звестак следства, забойца выпусціў шэсць куль у спіну апазіцыянера. Чатыры з іх дасягнулі мэты. У гэты час аўтамабіль супольніка бандыта параўняўся з месцам здарэння, кілер сеў у аўто, і яны з'ехалі.

Паводле справы аб забойстве Нямцова былі затрыманыя пяцёра жыхароў Чачэніі. 8 сакавіка Басманны суд Масквы санкцыянаваў арышт Заура Дадаева, Анзора Губашава, Хамзата Бахаева, Тамерлана Эскерханава і Шагіда Губашава. Яшчэ адзін падазраваны паводле гэтай справы - Беслан Шаванаў - зладзіў самападрыў, калі супрацоўнікі праваахоўных органаў спрабавалі затрымаць яго ў Грозным.