Мікалай Статкевіч: Не імкнуся ў героі, але хачу застацца прыстойным чалавекам

Бялыніцкі журналіст Барыс Вырвіч 16 траўня атрымаў ліст з Магілёўскай турмы №4 ад палітвязня Мікалая Статкевіча.

Экс-кандыдат у прэзідэнты распавёў пра ўмовы свайго ўтрымання на новым «старым» месцы зняволення, паведамляе сайт ПЦ «Вясна».

Між іншым, палітвязень піша:

«… Але цяпер я зноў у Магілёўскай турме, куды мяне накіраваў суд да канца тэрміну, і пісаць тут куды болей зручна. Таму збіраюся адказваць на ўсе лісты.

Тое, што я зноў на турэмным рэжыме, чакалася першапачаткова. Мабыць, нехта палічыў, што калонія не здольная мяне пераканаць напісаць тое «прашэнне». На самай справе, хоць калонія - гэта непрыемнае, цяжкае і дэпрэсіўны месца, але нічога «шокавага» там няма. Вельмі нагадвае войска - такія ж казармы (толькі без зброевай), перасоўванне строем у калонію і інш. Толькі праца замест вайсковай падрыхтоўкі. Турма ж з'яўляецца сур'ёзным выпрабаваннем для фізічнага і псіхічнага здароўя праз пастаяннае знаходжання толькі ў замкнёнай прасторы. Ну а другая «крытая» (турма) запар прызначаецца найбольш небяспечным і непакорлівым арыштантам і мае на мэце зламаць іх фізічна і маральна. Спадзяюся вытрымаць, але цвёрда ведаю толькі адно - здрады ад мяне не дачакаюцца. Не імкнуся ў героі, але хачу застацца прыстойным чалавекам. На жаль, у нашай краіне гэта можа каштаваць даволі дорага. Гатовы плаціць.

Вырашыў сядзець адзін, так як усе «афіцыйныя» сродкі ціску (ШІЗА, ПКТ, цяжкая праца) на мне ўжо неаднаразова апрабавалі. Застаюцца толькі «неафіцыйныя» - праз адмыслова падабраных сукамернікаў. Мяне гэта асабліва не палохае - я і сам магу націснуць. Але пастаянна кантраляваць паводзіны суседзяў не хачу. Надакучыла.

Газет не бачыў з красавіка. Адзіная крыніца інфармацыі тут - 1-я праграма Беларускага радыё з рэпрадуктара ў камеры».

Свой ліст журналісту Мікалай Статкевіч напісаў у магілёўскай турме 10-га траўня. Са слоў Барыса Вырвіча, з ліста ясна, што ў красавіку падчас знаходжання ў Шклоўскай калоніі палітвязню дайшлі не ўсе лісты з волі. Таксама палітвязень у лісце напісаў пра апошні час свайго знаходжання ў калоніі, што «з канца сакавіка апынуўся ў ШІЗА, а потым у ПКТ, дзе пісаць доўга не вельмі зручна - цёмна і нават нармальна прысесці няма дзе», ды падзяліўся сваімі меркаваннямі з нагоды планаў да выбараў і стану спраў у апазіцыйных арганізацыях.