25 чэрвеня 2024, aўторак, 1:50
Падтрымайце
сайт
Сім сім,
Хартыя 97!
Рубрыкі

«Электрамайдан» у Арменіі: дэманстранты адмаўляюцца пакідаць цэнтр Ерэвана

23

Армянская паліцыя заклікала пратэстоўцаў у цэнтры Ерэвана разысціся і вызваліць заблакаваныя вуліцы.

У той жа час, з паведамленняў мясцовых СМІ, улады паабяцалі не ўжываць сілу да таго часу, пакуль акцыя мае мірны характар. Мінулай ноччу больш за 6 тысяч чалавек, якія пратэставалі супраць падвышэння кошту электраэнэргіі, распачалі другую спробу рушыць да рэзідэнцыі прэзідэнта, але былі заблакаваныя паліцыяй.

Фота: AFP

Уночы да пратэстоўцаў далучылася група армянскіх палітыкаў і грамадскіх дзеячаў, што сфармавалі "жывы шчыт" паміж удзельнікамі акцыі пратэсту ў цэнтры Ерэвана і паліцэйскімі, перадае BBC.

З паведамленняў відавочцаў і журналістаў, колькасць пратэстоўцаў на праспекце Баграмяна зноў расце. Паліцыя ўстанавіла там загароды, паведамле News.am.

"Сёння мы тут, бо ўчора [ў аўторак] былі сутыкненні паміж мітынгоўцамі і паліцыяй. Каб не паўтарылася гэта, мы сёння тут, каб ішлі нармальныя перамовы, каб усё было высветлена мірным шляхам", - сказаў агенцтву Reuters адзін з пратэстоўцаў.

Фота: AFP

На мінулым тыдні, нягледзячы на грамадскае абурэнне, Дзяржаўная камісія рэгулявання грамадскіх паслуг Арменіі падвысіла тарыфы на электраэнэргію больш як на 16%.

Галоўным патрабаваннем пратэстоўцаў застаецца скасаванне пастановы ўладаў аб павышэнні коштаў.

Між тым, як паведамілі "Інтэрфаксу" ў Дзяржаўнай камісіі рэгулявання грамадскіх паслуг, пытанне аб пераглядзе гэтай пастановы не абмяркоўваецца. "Мы не прымалі пастанову, якая мае патрэбу ў карэктаванні", - цытуе агенцтва прэс-сакратара Камісіі рэгулявання грамадскіх паслуг Марыям Сцепанян.

Раней пратэстоўцы адмовіліся ад сустрэчы з прэзідэнтам Арменіі Сержам Саргсянам, прапанаваўшы кіраўніку дзяржавы ў жывым эфіры абвясціць нядзейным пастанову аб падвышэнні тарыфаў на электраэнэргію.

24-гадзінная акцыя пратэсту праходзіць у Ерэване на плошчы Свабоды з 19 чэрвеня. Некаторыя СМІ ўжо назвалі гэтую акцыю "электрамайданам". Раным рана ў аўторак паліцэйскія разагналі пратэстоўцаў, ужыўшы вадамёты і затрымаўшы блізу 240 чалавек.

Фота: Reuters

Пасля аднаўлення акцыі ў аўторак дэманстранты адгарадзіліся ад паліцыі самаробнай барыкадай і наладзілі сядзячы страйк. Удзельнікі акцыі прынеслі некалькі сметніц на праспект маршала Баграмяна, дзе размяшчаюцца ўрадавыя будынкі, і размясцілі іх проста насупраць паліцэйскага ачаплення.

Фота: Reuters

Многія размахвалі нацыянальнымі сцягамі і выкрыквалі "Ганьба!" і "Не рабунку!".

Пад падобнымі ж лозунгамі на мінулым тыдні праходзілі акцыі пратэсту і ў іншых гарадах Арменіі. Удзельнікі акцыі, якая прайшла ў нядзелю ў горадзе Гюмры, таксама неслі плакаты з лозунгам "Мы не будзем плаціць!".

Дзяржаўная камісія рэгулявання грамадскіх паслуг Арменіі ўстанавіла новыя тарыфы на электраэнергію 17 чэрвеня. Згодна з пастановай камісіі, з 1 жніўня плата падвышаецца на 6,93 драма (блізу 0,015 даляра) да 48,78 драма (блізу 0,1 даляра) за кілават-гадзіну.

Улады патлумачылі такія захады ваганнямі курсаў валют.

Праз шчыльныя сувязі з Масквой Арменія таксама патрапіла пад удар праз эканамічны крызіс у Расеі.

Напісаць каментар 23

Таксама сачыце за акаўнтамі Charter97.org у сацыяльных сетках