П'яны падлетак раз'язджаў па Менску на квадрацыкле

Паводле вынікаў медыцынскай экспэртызы ў крыві школьніка было 0,31 праміле алкаголю.

Праваахоўнікі ўночы 29 жніўня на 2-м Дражненскім завулку затрымалі 15-гадовага жыхара сталіцы, які ў нецвярозым стане кіраваў квадрацыклам, паведамляюць «Мінск-Навіны».

Як распавяла старэйшая інспектарка агітацыі і прапаганды ДАІ Партызанскага раёна Таццяна Спадабаева, адказваць за дзеянні падлетка будуць бацькі – на іх супрацоўнікі інспекцыі ў справах непаўналетніх склалі пратаколы.

Самога парушальніка нельга пакараць, бо ён не дасягнуў узросту прыцягнення да адміністрацыйнай адказнасці. Аднак пасля разгляду матэрыялаў справы камісіяй, магчыма, будзе разглядацца пытанне аб пастаноўцы падлетка на прафілактычны ўлік у ІСН.