ЗША размесцяць у Еўропе дадатковую партыю штурмавікоў
- 19.09.2015, 11:17
- 8,437
Амерыканскія ВПС размесцяць у Еўропе дадаткова тузін штурмавікоў A-10 Thunderbolt II.
Пра гэта паведамілі з штаб-кватэры камандавання ЗША ў Еўропе, піша "Укрінформ".
"ВПС Злучаных Штатаў разгорнуць 12 самалётаў A-10 Thunderbolt II на базах ва ўсёй Еўропе ў якасці працягу падтрымкі пакета захадаў бяспекі ў межах аперацыі Паўночнаатлантычнага альянсу", - паведаміў афіцэр у сувязях з грамадскасцю Дэвід Вэстоўвэр.
Разам з самалётамі прыбудуць блізу 300 чалавек асабовага складу з базы ВПС ЗША ў Мудзі, штат Джорджыя, і дадатковае абсталяванне. Экспедыцыйная знішчальная эскадрылля будзе праводзіць вучэнні разам з хаўруснікамі ў NATO і еўрапейскімі партнёрамі ў мэтах умацавання ўзаемадзеяння. Місія таксама прадэманструе "прыхільнасць ЗША задачам у падтрыманні бяспекі і стабільнасці ў Еўропе".
Канкрэтныя месцы размяшчэння штурмавікоў будуць названыя пасля іх прыбыцця на кантынент.
A-10 Thunderbolt II - аднамесны двухрухавіковы штурмавік, які быў распрацаваны ў ЗША для знішчэння танкаў, бронемашын і розных наземных аб'ектаў супраціўніка.