Загінулая жанчына прапрацавала ў ГЦ «Новая Еўропа» ўсяго пару дзён
3- 9.10.2016, 12:49
- 25,559
Жанчына працавала на трэцім паверсе ў «астраўку» з акулярамі.
Сёння гандлёвы цэнтр «Новая Еўропа» адкрыўся, як і заўсёды, а 10:00. Наведвальнікаў з самай раніцы практычна няма, як і слядоў таго, што адбылося. Аб тым, што здарылася тут нагадваюць толькі спалоханыя твары прадаўцоў і размовы пра нападніка. Журналісты onliner.by паспрабавалі аднавіць карціну таго, што адбылося ўчора.
- Шмат хто сёння не выйшаў на працу. Мы з другой змены, нічога не ведаем, - кажуць у ювелірнай краме.
- Без каментароў! - адмахваюцца прыбіральшчыцы.
Святлана і Юлія, работніцы крамы Vogman, кажуць, што бачылі момант, калі хлопец зайшоў у гандлёвы цэнтр.
- Я сядзела насупраць уваходу. Бачу - зайшоў хлопец у ярка-аранжавай куртцы, - распавядае Юлія. - Потым пачула гук пілы і дым. Ён уключыў яе на ўваходзе. Як ён даставаў пілу з заплечніка, не бачыла.
Дарэчы, у рэдакцыю выдання напісаў Ягор. Ён запэўнівае, што яны з жонкай бачылі, як хлопец ідзе да ўваходу з ужо ўключанай бензапілой:
«Мы шпацыравалі з жонкай і маленькім дзіцем у ГЦ «Еўропа». Калі мы праходзілі міма цэнтра з боку вуліцы Куйбышава, я заўважыў дзіўнага чалавека з працуючай бензапілой аранжавага колеру ў руках. Спачатку я падумаў, што гэта работнік якой-небудзь арганізацыі, т. д. Ён быў у ярка-аранжавым адзенні (дакладна не памятаю, куртка ці камізэлька на ім была). Але потым, калі я павярнуўся яму ўслед, то ўбачыў за спіной вялікі чахол ад гітары. Усё гэта здалося дзіўным, але нават у галаву не магло прыйсці, што гэта вар'ят, які ішоў забіваць. Ішоў ён, дарэчы, вельмі ўпэўненай хадой, ні на каго не зважаючы».
- Мы спачатку нічога не зразумелі. Потым убачылі, як бягуць людзі. Стала гаснуць святло, - узгадвае Святлана. - Мы выйшлі. Бачым - на падлозе жанчына ляжыць і лужына крыві. Адразу ж пабеглі зачыняць краму і выбеглі праз чорны ход.
- З ім яшчэ наша прыбіральшчыца Ірына сутыкнулася. Гэта яна была першая, хто яго спыніў, - запэўніваюць дзяўчыны. - Яна ў нас дзюдаістка, таму не спалохалася. Ды і ён такі худзенькі, гэты хлопец. Быццам бы яе таксама ранілі. Але мы не ведаем, ці звярталася яна ў бальніцу.
Загінулая жанчына, са слоў прадаўцоў, працавала на трэцім паверсе ў «астраўку» з акулярамі. Сёння крама зачыненая. На працоўным месцы - нікога.
- Учора яе шукаў гаспадар пункта, і высветлілася, што гэта яна, - успамінаюць работнікі крамы насупраць. - Яна пайшла сабе выбраць калготкі ўніз. І першая трапілася на дарозе ў гэтага хлопца.
- Мы нават не паспелі паразмаўляць толкам, - кажуць шакаваныя прадаўцы. - Гэта страшна, спаць не маглі ўсю ноч.
Уладальнік крамы, дзе працавала загінулая, дагэтуль у шоку. Ён адмаўляецца гаварыць праз тэлефон.
- Я ўсё перадаў ужо органам. Ні імя яе, нічога не скажу, - адмахваецца ён. - І каментаваць таксама не буду. Мяне органы папярэджвалі, што вы можаце тэлефанаваць.
- Дзяцей хавалі за паліцы, каб ён не дай бог нічога тут не зрабіў, - успамінаюць прадаўцы. - А ён вёў сябе вельмі спакойна. Не кідаўся, нічога.
- Вось кажуць, што ён вельмі прыстойна апрануты быў, а на самай справе мне так не падалося. Доўгія тлустыя валасы нейкія, - кажа дзяўчына з кавярні Yumbrik.
Нагадаем, 8 кастрычніка каля 17:30 малады чалавек зайшоў у гандлёвы цэнтр "Новая Еўропа" з чахлом для музычнага інструмента і бензапілой. З яе дапамогай ён прычыніў цялесныя пашкоджанні жанчыне, 1973 года нараджэння, якая памерла на месцы здарэння. Затым ён дастаў з чахла сякеру, з дапамогай якога прычыніў цялесныя пашкоджанні яшчэ адной спадарыні, 1970 года нараджэння. Яна шпіталяваная, ёй аказваюць неабходную медыцынскую дапамогу.
- Праца з пацярпелай працягваецца, цяпер галоўнае - канчаткова завяршыць абследаванне і ацаніць стан жанчыны, - распавялі ў бальніцы. - Пры неабходнасці ёй будзе аказана псіхалагічная дапамога.