«Трывожны званочак»: дзяржаўныя банкі губляюць прыбытак

Фінансавыя патокі, якія доўгі час забяспечвалі прыбытак банкаўскага сектару, пачалі вычэрпвацца.

Паводле звестак, апублікаваных Нацбанкам, адразу некалькі буйных дзяржаўных банкаў рэзка знізілі прыбытак цягам студзеня-кастрычніка ў параўнанні з такім жа адрэзкам мінулага года.

Напрыклад, Беларусбанк, які з'яўляецца найбуйнейшым у краіне банкам, скараціў чысты прыбытак на 16,7%, а Белінвестбанк і Белаграпрамбанк — у 1,4 разы і на 34,2% адпаведна.

На фоне гэтага паказчыкі банкаў з прыватнымі акцыянерамі выглядаюць лепш. Істотна нарасцілі прыбытак Прыёрбанк, Альфа-Банк, МТБанк і ТК Банк.

У чым прычына такой невясёлай статыстыкі з боку дзяржбанкаў і ці можна лічыць гэта «трывожным званочкам» для беларускай эканомікі, піша Заўтра тваёй краіны.

Тарасаў: Рана рабіць глабальныя высновы

Магчыма, што такая сітуацыя не з'яўляецца сур'ёзнай нагодай для турботы, а назіраны спад — часовы. Такі пункт гледжання падзяляе фінансавы аналітык Уладзімір Тарасаў.

— Невядомыя прычыны, па якіх у гэтых банкаў паменшыўся прыбытак, — кажа ён. — Справа ў тым, што бываюць перыяды, калі прыбытак паступае нераўнамерна. Калі паглядзець гісторыю буйных як дзяржаўных, так і недзяржаўных банкаў, то там вельмі вялікія ваганні.

Магчыма, як раз з гэтым і звязана прычына пагаршэння статыстыкі, заўважае эксперт.

— Больш таго, часам банкі, замест таго, каб накіраваць даходы на прыбытак, накіроўваюць іх у рэзервы. У выніку прыбытак быццам бы зніжаецца, хоць на самай справе даходы застаюцца вельмі высокімі, — падкрэслівае Уладзімір Тарасаў.

Іосуб: Зніжэнне прыбытку банкаў — гэта адлюстраванне праблем беларускай эканомікі

На меркаванне старэйшага аналітыка Альпары Вадзіма Іосуба, «гэта трывожны званочак, нельга сказаць, што нечаканы».

— Гэта прамое следства павелічэння дрэнных актываў у банкаўскай сістэме, пад якія трэба ствараць рэзервы, — кажа экспэрт. — Адпаведна, гэта вядзе да памяншэння прыбытку.

Сёння доля дрэнных актываў у беларускіх банках складае 14,3%, што можа быць даволі дрэнным знакам. Прычым, да такіх актываў належаць крэдыты буйным дзяржаўным прадпрыемствам, якія фінансуюцца паводле розных дзяржаўных праграм.

— Менавіта дзяржбанкі займаюцца фінансаваннем дзяржпраграм і менавіта ў дзяржбанках доля дрэнных актываў вышэйшая, чым у сярэднім па краіне. Напрыклад, у БПС банку гэтая лічба дасягала 25%, — нагадвае Вадзім Іосуб.