Антусевіч: Выдаткі на пошук «дармаедаў» - страляніна з гарматы па вераб'ях

Выдаткі на працу чыноўнікаў, якія шукаюць «дармаедаў», несувымерныя з тымі грашыма, якія дзяржава ў выніку атрымлівае.

З беларускіх «дармаедаў» сабрана ўжо амаль мільён рублёў. Грошы паступілі ў бюджэт ад тых, хто ў мінулым годзе не ўдзельнічаў у фінансаванні дзяржаўных расходаў, адзначылі ў Міністэрстве падаткаў і збораў.

Паведамленні аб патрэбе заплаціць «падатак на дармаедства» накіраваныя яшчэ 50-ці тысячам беларусаў.

«Выдаткі на працу чыноўнікаў, якія шукаюць «дармаедаў», несувымерныя з тымі грашыма, якія дзяржава ў выніку атрымлівае», - каментуе «Радыё Рацыя» намеснік Старшыні Беларускага Кангрэсу дэмакратычных прафзвязаў Сяргей Антусевіч:

- Гэта падобна да страляніны з гарматы па вераб'ях. Натуральна, мы пра гэта казалі і раней. Можна, вядома, паказваць і казаць пра якія-небудзь лічбы, але пры гэтым існуюць вялікія выдаткі на адміністрацыйныя працэдуры. Тым больш што мы ведаем, што Міністэрства падаткаў і збораў ужо выбачылася, маўляў, атрымальнікі, магчыма, выпадкова трапілі ў гэты спіс, але ўсё адно трэба ісці і даказваць сваю невінаватасць. Мы па-ранейшаму супраць гэтага ўказу і будзем дамагацца яго скасавання.