Гульні ФСБ: навошта Саўчанка патаемна ездзіла ў Менск

На днях дэпутатка Вярхоўнай Рады Украіны з фракцыі "Бацькаўшчына" Надзея Саўчанка таемна наведала Менск.

Там яна сустрэлася з верхаводамі тэрарыстычных арганізацый ДНР і ЛНР, якія знаходзяцца пад кантролем Расеі. Паводле звестак трох крыніц ЛІГА.net, дэпутатка некалькі гадзін мела зносіны з верхаводамі баевікоў, а саму сустрэчу ў Менску арганізавала Федэральная служба бяспекі Расеі пры садзейнічанні пасольства РФ у Беларусі. Што адбываецца і навошта Саўчанка ездзіла ў Менск?

ФСБ у Менску

Як распавёў ЛІГА.net адзін з сябраў украінскай дэлегацыі на перамовах у Менску, 7 снежня, калі дэлегацыя прыбыла ў сталіцу Беларусі на чарговую сустрэчу спецпасланнікаў Украіны, Расеі і АБСЕ, службоўцы амбасады Украіны ў Беларусі паведамілі ім, што за некалькі хвілін да ўкраінскай дэлегацыі ў Менск рэйсавым самалётам прыбылі верхаводы баевікоў Захарчанка і Платніцкі: "Сустрэлі іх прадстаўнікі расейскай амбасады ў суправаджэнні служачых Федэральнай службы бяспекі Расеі. Яны забралі іх, пасадзілі ў машыну і павезлі". Паводле іншай інфармацыі, разам з Захарчанкам замест Платніцкага з’явіўся Пушылін.

У гэты ж час з 09:00 да 11:00 раніцы 7 снежня на цэнтральных расейскіх каналах і сайтах тэрарыстаў прайшла інфармацыя аб тым, што баевікі прыбылі ў Менск нібыта на сустрэчу ў рамках трохбаковай кантактнай групы (афіцыйна яны не бяруць удзелу ў гэтых пасяджэннях). "Мы былі ў шоку. Спыталі ў АБСЕ, што гэта значыць. Нам адказалі, што тэрарыстаў не запрашалі і не валодаюць ніякай інфармацыяй", - кажа прадстаўнік украінскай групы.

Тады Леанід Кучма (прадстаўнік Украіны ў кантактнай групе) пацікавіўся ў Марціна Сайдзіка (спецпрадстаўнік АБСЕ) і Барыса Грызлова (прадстаўнік Масквы), аб чым ідзе гаворка, хто запрасіў баевікоў. Сайдзік сказаў, што нічога не ведае і не валодае ніякай інфармацыяй. "Грызлоў штосьці прамямліў. Але гэтыя рожы так і не з'яўляліся ні на сустрэчы кантактнай групы, ні на падгрупах, і на паверсе, дзе праходзілі пасяджэнні груп, іх не было", - распавёў суразмоўца.

Пра паездку ў Менск Саўчанкі і яе сустрэчы з тэрарыстамі і паведаміў журналіст Сяргей Іваноў. "Аўтамабіль з дэпутаткай Саўчанка д/н АА 7283 МК перасёк дзяржаўную мяжу ў ноч з 6 на 7 снежня, вярнуўся ва Украіну 8 снежня", - паведаміў ён на сваёй старонцы ў Facebook. ЛІГА.net накіравала запыт у Дзяржаўную памежную службу з гэтай нагоды.

Раней Саўчанка здзяйсняла візіты на акупаваныя тэрыторыі, дзе, з яе ўласных слоў, сустракалася з тымі, хто трымаў яе ў палоне. Прычым спачатку факт паездкі і сустрэч адмаўляўся, але пазней дэпутатка такі пацвердзіла візіт на акупаваныя тэрыторыі. "70% людзей і нават тыя, якія трымалі мяне ў палоне, шкадуюць аб тым, што яны паднялі зброю", - распавядала яна. Акрамя таго, дэпутатка раней ездзіла ў Расею, нягледзячы на тое, што ў свой час за вызваленне Саўчанкі з РФ уладам Украіны давялося аддаць Маскве двух кадравых афіцэраў ГРУ РФ. Але візіт у Менск, здаецца, насіў асаблівы характар.

Уцягваюць сваякоў

"Вельмі абвастрылася сітуацыя са сваякамі ўкраінскіх закладнікаў. Хтосьці іх накручвае, што Украіна нібыта нічога не робіць", - кажуць ЛІГА.net суразмоўцы, якія займаюцца абменам палонных.

У калідорах улады лічаць, што не апошнюю ролю ў гэтым адыгрывае Саўчанка. Адразу два суразмоўцы сцвярджаюць, што палітык часта бачыцца са сваякамі закладнікаў і пераконвае іх, што ўлады нічога не робяць, што трэба неяк падштурхоўваць знутры Адміністрацыю прэзідэнта і прадстаўнікоў Украіны ў Менску да таго, каб сесці за стол перамоваў з прадстаўнікамі Масквы, а непасрэдна з яе марыянеткамі ў асобе Захарчанкі і Платніцкага - прызнаць іх уладу і грамадзянскую вайну, а не расейска-ўкраінскую, як форму існага канфлікту.

"Сваякоў заложнікаў уцягваюць у жудасныя маніпуляцыі, маўляў, трэба весці прамыя перамовы, каб аддалі хлопцаў. І што ўкраінская ўлада нічога не робіць. Мамы вельмі радыкальна настроены і адчуваецца, што іх накручваюць", - кажа іншы суразмоўца з ліку прадстаўнікоў Украіны ў кантактнай групе ў Менску.

Аднаму з сябраў украінскай дэлегацыі ў Менску на рабочай падгрупе прадстаўніца АРДВ прама прыгразіла, што калі прамыя перамовы не пачнуцца - маці і жонак украінскіх закладнікаў нацкуюць так, каб яны пачалі спальваць дамы ўдзельнікаў менскай групы.

Рэалізацыя прамых перамоваў - цалкам адпавядае пажаданням Масквы. Прамыя перамовы азначаюць, што Расея больш не ўдзельнік вайны, не з'яўляецца бокам канфлікту і не нясе ніякай адказнасці за развязванне вайны супраць Украіны. "Але ўсе ведаюць. што ніякага вызвалення закладнікаў без пастановы Масквы не будзе - на якія б саступкі і кампрамісы мы ні ішлі. Як бы мы ні стараліся - Масква гэтага не дасць зрабіць", - кажуць ва ўкраінскай групе.

Роля Саўчанкі

"Навошта верхаводаў тэрарыстаў сустракала ФСБ і расейскае пасольства і везла з аэрапорта на машыне з дыпламатычнымі нумарамі. Я бачу сітуацыю так: нас падштурхоўваюць да прамых перамоваў, гэта ў адкрытую робіць РФ. А свет стаміўся і хоча на нас усё гэта зваліць. І вось яны распрацавалі новы ФСБшны сцэнар з Саўчанкай і мацярамі", - кажуць ЛІГА.net у менскай групе.

Паводле звестак суразмоўцы, сустрэча Саўчанкі з верхаводамі тэрарыстаў у прысутнасці прадстаўнікоў ФСБ была прысвечана менавіта гэтаму. Сцэнар - уцягвання сваякоў заложнікаў у працэс з мэтай ціску на Украіну, каб прымусіць афіцыйныя ўлады весці прамыя перамовы, якія ўзначаліць сама Саўчанка. Адначасова гэта робіцца для таго, каб дыскрэдытаваць уладу і саму ідэю менскіх перамоваў, якія для Масквы даўно перасталі мець каштоўнасць.

Паводле некаторых звестак, дэпутатка Саўчанка ў найбліжэйшыя дні мае намер аб'явіць нейкую інфармацыю. Учора ў Кіеве дэпутатка брала ўдзел у канферэнцыі, прысвечанай палонным у Данбасе. Перад пачаткам канферэнцыі журналіст ЛІГА.net прама задаў пытанне дэпутатцы, навошта яна ездзіла ў Менск, аб чым гаварыла з верхаводамі тэрарыстаў і чаму ўсё гэта было зроблена сакрэтна. "Я не для таго сюды прыйшла, каб адказваць на вашы пытанні", - сказала дэпутатка. На паўторнае пытанне - адрэзала: "Я што, незразумела сказала?". Іншая журналістка - Вольга Сніцарчук - паўтарыла пытанне падчас канферэнцыі. Саўчанка зноў не захацела адказваць, а на паўторнае пытанне і зусім падвысіла голас на журналістку.

Нежаданне Масквы аддаваць закладнікаў і ісці на кампрамісы красамоўна пацвярджае ігнараванне ініцыятывы Украіны аб масавым абмене, зробленай напярэдадні. Украіна прапанавала аддаць 228 баевікоў за сваіх 42-х грамадзян. Але гэтую ідэю ні верхаводы тэрарыстаў, ні Масква нават не каментуюць. Навошта? Мэта Расеі і падкантрольных ёй баевікоў не ў тым, каб вырашыць праблему людзей, якія каторы год знаходзяцца ў падвалах тэрарыстаў. А рэалізаваць план, які можна ўмоўна назваць "як выйсці сухімі з вады" - развязаць вайну, а затым зрабіць выгляд, што гэта не ты пачаў. І, зразумела, зняць санкцыі і ўсю адказнасць - гэта і будзе вынік "прамых перамоваў". Не выключана, што нешта такое ФСБ і спрабуе рэалізаваць: правесці абмен палоннымі так, каб выставіць усё гэта як вынік прамых перамоваў нібыта Украіны (на чале з Саўчанкай) з "законнай уладай Данбаса" - у выглядзе тэрарыстаў. Менавіта таму ўкраінская ініцыятыва аб масавым абмене не цікавіць Крэмль.

Аднак у выпадку рэалізацыі плана ФСБ вайна не спыніцца, як лічаць тыя, каму дэталі не важныя. Вайна стане яшчэ больш жорсткай, таму што развяжа рукі Расеі. Бо калі сёння кожны набой, выпушчаны ў украінскі дом каштуе расейскай эканоміцы мільярды праз санкцыйны рэжым, то ў той момант, калі пачнуцца "прамыя перамовы" з тэрарыстамі - расейска-ўкраінская вайна стане грамадзянскай, а санкцыі - недарэчнымі, таму што гэта ж "ўнутраны канфлікт", дзе ёсць "два бакі". Гэта будзе азначаць, што вайна для Расеі стане бясплатнай і ваяваць можна будзе бясконца доўга - аж да апошняга ўкраінца. І ці разумее Надзея Саўчанка, што яна робіць - пакуль яшчэ адкрытае пытанне.