Днепр абяцаюць папоўніць рыбай

Праз мор у жніўні ў Дняпры загінула як мінімум 20% лакальных папуляцый рыб.

Масавая гібель рыбы ў Дняпры ў жніўні гэтага года адбылася праз значны мор рыбы на сумежнай расейскай тэрыторыі ў Сафонаўскім і Дарагабужскім раёнах. Паводле папярэдніх ацэнак праз мор у Дняпры загінула як мінімум 20% лакальных папуляцый рыб. Экасістэме ракі прычыненая велізарная шкода.

На мінулым тыдні ў Санкт-Пецярбургу прайшло пасяджэнне Расейска-Беларускай змяшанай Камісіі ў галіне рыбнай гаспадаркі.

У складзе беларускай дэлегацыі ў пасяджэнні ўдзельнічаў намеснік начальніка Дзяржаўнай інспекцыі Аляксандр Дуньковіч. Адно з паднятых ім пытанняў датычылася зарыблення ракі Днепр, паведамляе gosinspekciya.gov.by.

У жніўні гэтага года на транспамежным адрэзку Дняпра назіралася масавая гібель рыбы. З тэрыторыі Смаленскай вобласці ўніз па плыні плыла рыба са слядамі разлажэння. Звязаўшыся з расейскімі калегамі, супрацоўнікі Дзяржінспекцыі атрымалі пацверджанне, што ачаг гібелі знаходзіцца на сумежнай баку - у Сафонаўскім і Дарагабужскім раёнах. Там адбыўся значны мор: праз моцныя залевы і разліў ракі на затопленых поймах і лугах пачалося актыўнае гніенне расліннасці, што разам з анамальна высокімі тэмпературамі прывяло да зніжэння канцэнтрацыі кіслароду ў вадзе.

Паводле інфармацыі расейскіх спецыялістаў за два дні на іх тэрыторыі было сабрана блізу 1,3 тысячы асобін загінулай рыбы. А толькі за адзін дзень працы на беларускім баку - больш за 4,5 тысячы асобін. Паводле папярэдніх ацэнак праз мор у Дняпры загінула як мінімум 20% лакальных папуляцый рыб. Экасістэме ракі прычыненая велізарная шкода. Такая сітуацыя з масавай гібеллю рыбы на Дняпры была зафіксаваная ў 1985 годзе. Як паказаў час, натуральнае аднаўленне згубленых рэсурсаў адбылося толькі праз 20 гадоў.

Удзельнікі Камісіі пагадзіліся, што для адраджэння Дняпра неабходныя мерапрыемствы ў зарыбленні ракі абарыгеннымі відамі, яны будуць праведзеныя ў 2017 годзе.