Судовыя выканаўцы заблакавалі грошы на мабільніку Анатоля Лябедзькі

Лідар Аб'яднанай грамадзянскай партыі застаўся без сотавай сувязі.

Пра пастанову судовых выканаўцаў арыштаваць ягоны мабільны рахунак кіраўнік АГП даведаўся толькі на наступны дзень, паведамляе charter97.org.

У сваім «Фэйсбуку» Анатоль Лябедзька напісаў: «Не тэлефануй мне, не звані... Сябры, я не ў ад'ездзе, не ў эміграцыі, не ў запоях, не ў адпачынку. Як выявілася, судовыя выканаўцы наклалі арышт на грошы, якія знаходзяцца на балансе майго тэлефоннага нумара. Аператар «абрэзаў правады». А я ж думаю, чаму мне другі дзень ніхто не тэлефануе... А вось цяпер нават ацаніў хараство цішыні…».

Можна меркаваць, што арышт на грошы Лябедзькі наклалі судовыя выканаўцы, каб апазіцыянер аплачваў штрафы за несанкцыянаваныя вулічныя акцыі. Дарэчы, такімі ж захадамі і статусам «невыязнога» пагражаюць Мікалаю Статкевічу, які не аплачвае штрафы за вулічныя акцыі.