Патупчык паехаў у Маскву выпрошваць зніжку на газ

17 траўня міністр энэргетыкі Беларусі Уладзімір Патупчык накіраваўся ў Маскву на сустрэчу з кіраўніком Мінэнэрга РФ Аляксандрам Новакам.

Пра гэта паведамляе interfax.by.

«Міністр накіраваўся ў Маскву на перамовы», - паінфармавалі ў Мінэнэрга.

Чакаецца, што асноўнай тэмай перамоваў стане газавае пытанне, адзначылі ў міністэрстве.

Як паведамлялася, 12 траўня на паседжанні «саюзнага саўміна» прэм'еры Расеі і Беларусі даручылі ўрадам дзвюх краін працягнуць кансультацыі аб рознагалоссеях у частцы фармавання кошту на расейскі газ для Беларусі, ад чаго залежыць наяўнасць або адсутнасць запазычанасці беларускага боку.

Тады ж кіраўнік беларускага міністэрства энэргетыкі Уладзімір Патупчык заявіў, што Беларусь не прызнае запазычанасць перад Расеяй за пастаўлены газ.

«Няма ніякай запазычанасці. Беларусь плаціць у адпаведнасці з міжурадавай дамовай. Вось у судзе будзем і разбірацца з гэтым пытаннем», - сказаў Патупчык.

Ён адзначыў, што бакі па-рознаму трактуюць міжурадавую дамову аб газе.

«Расейскі бок мяркуе, што ёсць кошт «Ямала». Мы лічым, што з 1 студзеня павінны дзейнічаць рынкавыя роўнадаходныя кошты», - падкрэсліў Патупчык.

У сваю чаргу кіраўнік Мінэнэрга РФ Новак заявіў журналістам, што расейскі бок па-ранейшаму прытрымліваецца той пазіцыі, што Беларусь мае запазычанасць у аплаце газа.

«Ёсць абавязак перад «Газпрамам» за пастаўлены газ. За чатыры месяцы гэта больш за $125 млн. Лічба пастаянна змяняецца, кожны дзень», - сказаў Аляксандр Новак. «У адпаведнасці з кантрактам, ідзе недаплата», - дадаў ён.

Як паведамлялася, у пачатку траўня ААТ «Газпрам трансгаз Беларусь» звярнулася ў Міжнародны арбітражны суд пры Беларускай гандлёва-прамысловай палаце (БелГПП) з іскавымі заявамі да газазабеспячальных арганізацый Беларусі. Як падкрэслілі ў кампаніі, «у сувязі з наяўнасцю запазычанасці з боку газазабеспячальных арганізацый Рэспублікі Беларусь у аплаце пастаўленага прыроднага газу ААТ «Газпрамтрансгаз Беларусь» абараняе свае інтарэсы ў адпаведнасці з умовамі падпісаных дамоў».

Пазней віцэ-прэм'ер Беларусі Уладзімір Сямашка заявіў, што рэспубліка разлічвае плаціць больш нізкі кошт за расейскі газ, а не той, які просіць ААТ «Газпрам трансгаз Беларусь».

«З 1 студзеня гэтага года мы маем усе падставы, каб нашы суб'екты гаспадарання мелі больш нізкі кошт, чым нам прад'яўляе суб'ект гаспадарання Беларусі са статусам замежнага прадпрыемства «Газпрам трансгаз Беларусь», - сказаў Сямашка.

Кажучы аб абгрунтаванасці кошту на расейскі газ, ён адзначыў, што гэта пытанне ўзаемаадносінаў суб'ектаў гаспадарання.

«Гэта адносіны нашых аблгазаў з ААТ «Газпрам трансгаз Беларусь». Накшталт «ГазпрамТрансгаз Беларусь» падала пазоў у арбітражны суд пры Беларускай гандлёва-прамысловай палаце, уважаючы, што аблгазы недаплачваюць за той газ, які мы атрымліваем з 1 студзеня 2016 года. Але нашы галіны мяркуюць, што яны робяць правільна і карэктна, таму што ў нас падпісана цэлая сістэма пагадненняў на ўзроўні ўрадаў дзвюх краін», - сказаў ён.

Сямашка нагадаў аб пагадненні 2010 г. аб парадку доступу да паслуг пэўных манаполій, пагадненні ад 2011 года аб парадку фармавання коштаў на прыродны газ у Беларусі і дамовы ад 29 траўня 2014 года аб стварэнні ЕАЭС.

«Там усё дакладна распісана - калі, што, якія кошты дзейнічаюць, якія падыходы да фармавання гэтых коштаў ёсць», - падкрэсліў намеснік прэм’ера Беларусі.

Раней Сямашка таксама адзначаў, што ў Беларусі ёсць істотныя падставы для паніжэння кошту расейскага газу з 1 студзеня 2016 года. Аднак, як паведамлялася са спасылкай на намесніка міністра энэргетыкі Расеі Анатоля Яноўскага, віцэ-прэм'еры РФ і Беларусі Аркадзь Дварковіч і Сямашка на перамовах на пачатку студзеня не дамовіліся пра зніжку на расейскі газ.

«Газпрам трансгаз Беларусь» (з 2011 года належыць «Газпраму» на 100%) забяспечвае газазабеспячэнне і транспарціроўку газу па тэрыторыі Беларусі. Прадпрыемства эксплуатуе блізу 7 тыс. км газаправодаў дыяметрам ад 100 да 1400 мм, а таксама абслугоўвае беларускі ўчастак магістральнага газаправода «Ямал-Еўропа», які належыць ААТ «Газпрам».

Адзіным пакупніком газу «Газпрама» ў Беларусі выступае яго 100% даччынае таварыства ААТ «Газпрам трансгаз Беларусь». З 2008 года кошт газу разлічваецца штоквартальна паводле формулы з улікам індэксаў змянення коштаў газойля і мазуту (з 2013 года гэтая формула замацаваная міжурадавым пагадненнем).