Канстанцінопальскі патрыярхат: Можам надаваць аўтакефалію праваслаўным былой Рэчы Паспалітай без згоды Масквы

Беларусь і Украіна - кананічная тэрыторыя Канстанцінопальскай Царквы, а не Маскоўскага патрыярхату.

Пра гэта заявіў прадстаўнік Канстанцінопальскага Патрыярхату арцыбіскуп Ёў (Геча) у інтэрв'ю risu.org.ua.

«У гісторыі ўсё новыя Праваслаўныя Цэрквы да нашых дзён - гэта былыя тэрыторыі Сусветнага Патрыярхату, якім ён даваў аўтакефалію. І з кананічных прычын Сусветны Патрыярхат мае ў праваслаўным свеце першае месца», - заявіў іерарх.

З прычыны існавання Кіеўскай мітраполіі, якая аб'ядноўвала ўсіх праваслаўных Рэчы Паспалітай, Канстанцінопаль даў без згоды Маскоўскага Патрыярхату аўтакефалію Польскай Праваслаўнай Царкве ў 1924 годзе.

Кіеўская мітраполія была непасрэдна падпарадкаваная Канстанцінопалю да канца 17 стагоддзя, калі Маскоўскае царства захапіла Кіеў.

«На аснове чаго быў дадзены Томас у 1924 году Польскай Праваслаўнай Царкве? Канстанцінопаль разглядаў Польскі Касцёл як былую частку Кіеўскай мітраполіі. Як мы ведаем, пры мітрапаліце Кіпрыяне Цамблаку Кіеўская мітраполія знаходзілася ў межах польска-літоўскай дзяржавы, гэта значыць, яе межы пашыраліся і на тэрыторыю Польшчы, і на Літву», - сказаў арцыбіскуп.

Томас - пастанова кіраўніка памеснай праваслаўнай царквы ў якім-небудзь важным пытанні царкоўнай арганізацыі. У тым ліку Томас можа даваць частцы царквы правы аўтаноміі (частковага самакіравання) або аўтакефаліі (поўнага самакіравання).

Са слоў арцыбіскупа зразумела, што кананічнай тэрыторыяй Канстанцінопальскага Патрыярхату ўважаецца і Беларусь як былая частка Вялікага Княства Літоўскага, якая таксама ўваходзіла ў Кіеўскую праваслаўную мітраполію.

«Калі ў 1924 годзе Канстанцінопаль дараваў аўтакефалію Польскай Царкве на базе Кіеўскай мітраполіі, чаму сёння Канстанцінопаль не меў бы права надаць самой Кіеўскай мітраполіі стан аўтакефаліі? Калі гэта было магчыма ў 1924 годзе - гэта магчыма і сёння», - рэзюмуе іерарх.