Прафзвязы арганізуюць масавую акцыю пратэсту за скасаванне дэкрэта аб «дармаедах»

Незалежныя прафзвязы прапануюць актыўна змагацца з антыканстытуцыйным законам.

Лідар Беларускага прафзвязу работнікаў радыёэлектроннай прамысловасці (РЭП) Генадзь Фядыніч у экспрэс-каментары «Салiдарнасцi» пракаментаваў апублікаваны прыкладны пералік «складаных жыццёвых сітуацый», у выпадку якіх мясцовыя ўлады будуць вызваляць беларусаў ад так званага падатку на «дармаедаў».

- Я думаю, што сёння 70% насельніцтва жыве ў «цяжкай жыццёвай сітуацыі», - заявіў ён. - А ў якой сітуацыі знаходзяцца хатнія гаспадыні, якія таксама выконваюць вялікую працу? А што рабіць з былымі вайскоўцамі, якія не змаглі знайсці працу? А што рабіць з маладымі спецыялістамі, якія сядзяць без працы? А што рабіць з тымі, каму прапануюць працаваць за 150-200 рублёў, а іх гэта не задавальняе? Немагчыма зрабіць безапеляцыйны пералік, які прадугледзеў бы ўсе выпадкі. Ды і наогул, чаму беларус павінен даводзіць, што ён не вярблюд?

На думку прафсаюзнага лідара, чыноўнікі зрабілі вялікую памылку яшчэ і тым, што аддалі гэтыя пытанні на водкуп мясцовым уладам - бо паступленні ад «дармаедаў» пойдуць у мясцовыя бюджэты.

- Так што, мы не ведаем, якое кумаўство або сватаўство сёння ў рэгіёнах? Сваіх блізкіх яны вызваляць (не выключана, што выдадуць ім даведкі), а астатнім што рабіць? - кажа ён.

Суразмоўца назірае, што ўнесеныя папраўкі не супакоілі, а толькі раззлавалі людзей. І выхад з гэтай сітуацыі сёння толькі адзін - дэкрэт павінен быць скасаваны.

- Мы не будзем сядзець, склаўшы рукі, - заявіў Генадзь Фядыніч. - Для пачатку паўсюдна збяром подпісы і накіруем іх на адрас прэзідэнта. Калі гэта не дапаможа і галасы людзей не будуць пачутыя, тады застаецца толькі адно - будзем рыхтаваць масавую акцыю пратэсту за скасаванне дэкрэта.