У ЕЗ задумаліся аб безумоўным базавым даходзе для ўсіх еўрапейцаў

Неабходнасць у гэтым абумоўленая будучай хваляй беспрацоўя, выкліканай паўсюдным выкарыстаннем робатаў на вытворчасці.

Дэпутатка Еўрапарламента Мадзі Дэльва-Сцер (Mady Delvaux-Stehres) падала праект дакладу, у якім гаворыцца аб неабходнасці «сур'ёзна задумацца» аб увядзенні канцэпцыі безумоўнага базавага даходу. Неабходнасць у гэтым, на яе думку, абумоўленая будучай хваляй масавага беспрацоўя, выкліканай паўсюдным выкарыстаннем робатаў на вытворчасці, піша delfi.ee са спасылкай на The Independent.

Аўтарка праекта таксама паказала на тое, што трэба стварыць сістэму справаздачнасці пра ўплыў робатаў на фінансавыя вынікі кампаній. На яе падставе ў будучыні можна будзе прыняць пастанову аб змене падаткаабкладання і ўнёскаў на сацыяльнае забеспячэнне грамадзян.

Дакумент быў папярэдне ўхвалены і будзе вынесены на разгляд ўсіх чальцоў Еўрапарламента ў лютым. The Independent аднак не ўдакладняе, якая сума можа выплачвацца ў якасці безумоўнага базавага даходу.

У пачатку студзеня Фінляндыя запусціла двухгадовы эксперымент, закліканы выпрабаваць сістэму абавязковага базавга даходу. Улады краіны выпадковым чынам выбралі дзве тысячы беспрацоўных жыхароў ва ўзросце ад 25 да 28 гадоў, і пачалі штомесяц выдаваць ім па 560 еўраў. Гэтая сума, як пісала The Guardian, заменіць ім усё сацыяльныя льготы, і нават калі яны знойдуць працу, яе прадоўжаць выплачваць.

Безумоўны базавы даход уяўляе сабой канцэпцыю, якая гарантуе рэгулярную выдачу пэўнай сумы грошай кожнаму чальцу супольнасці. Яна не залежыць ад узроўню даходу або занятасці асобнага чалавека.