Ле Пен зноў заявіла, што прызнае Крым расейскім
33- 17.01.2017, 10:30
- 12,602
Яна таксама паабяцала, што будзе выступаць за скасаванне санкцый супраць Расеі.
Кандыдат у прэзідэнты Францыі ад ультраправай партыі «Нацыянальны фронт» Марын Ле Пен чарговым разам паабяцала прызнаць Крым часткай Расеі ў выпадку перамогі на выбарах.
На гэты раз яна заявіла пра гэта ў інтэрв'ю газеце «Известия».
«Пасля рэферэндуму, які паказаў згоду народа далучыцца да Расеі, я таксама прызнаю Крым часткай Расеі. Прыналежнасць Крыма Украіне была толькі адміністрацыйным пытаннем савецкіх часоў, паўвостраў ніколі не быў украінскім», - заявіла яна.
Палітык адзначыла тое, што міжнародная супольнасць і ААН не ўспрынялі факт волевыяўлення народа паўвострава, выклікае ў яе шкадаванне.
Яна таксама паабяцала, што будзе выступаць за скасаванне санкцый супраць Расеі.
Пра гэта ж яна казала і 3 студзеня ў інтэрв'ю BFMTV. Тады яна Ле Пен заявіла, што анэксія ўкраінскага Крыма Расеяй «не была незаконнай», бо яна перакананая, што на рэферэндуме «людзі прагаласавалі за тое, каб далучыцца да Расеі».
У сувязі з гэтым Служба бяспекі Украіны накіравала ліст у МЗС з нагоды забароны ўезду кандыдату ў прэзідэнты Францыі Марын Ле Пен ва Украіну.