Топ-мэнэджэра «Лабараторыі Касперскага» арыштавалі паводле справы аб здрадзе

Прадстаўнік кампаніі знаходзіцца ў СІЗА Лефортава паводле той жа справы, што і кіраўнік аднаго з падраздзяленняў ФСБ Расеі.

Арыштаваны топ-мэнэджар «Лабараторыі Касперскага» Руслан Стаянаў, які ўзначальвае ў кампаніі аддзел расследавання кіберзлачынстваў і цесна супрацоўнічае з праваахоўнымі органамі. Пра гэта ў сераду, 25 студзеня, паведамляе выданне «Коммерсант» са спасылкай на крыніцу, блізкую да ФСБ. У прэс-службе «Лабараторыі Касперскага» пацвердзілі факт арышту, падкрэсліўшы, што расследаванне «вядзецца ў дачыненні да прыватнай асобы».

Стаянаў знаходзіцца ў СІЗА Лефортава са снежня 2016 года. Адначасова па той жа справе арыштаваны і кіраўнік аднаго з падраздзяленняў цэнтра інфармацыйнай бяспекі (ЦЫБ) ФСБ Сяргей Міхайлаў, паведамляе выданне са спасылкай на крыніцы. Са старонак у сацыяльных сетках відаць, што Стаянаў апошні раз рэгістраваўся 4 снежня, Міхайлаў - 5 снежня.

Упраўленне ўласнай бяспекі (УУБ) ФСБ праводзіць расследаванне праз падазрэнні ў дзяржаўнай здрадзе (артыкул 275 Крымінальнага кодэкса РФ), паведамляюць крыніцы выдання. У рамках справы правяраецца інфармацыя аб магчымым атрыманні супрацоўнікам ЦІБ хабару ад замежнай арганізацыі. Пасярэднікам ў пагадненні, як мяркуецца, стаў супрацоўнік расейскай кампаніі ў сферы інфармацыйнай бяспекі.

Сітуацыя ў ЦІБ рызыкуе адбіцца на рынках кібербяспекі і электроннай камерцыі, удзельнікам якіх, магчыма, «давядзецца зноўку выбудоўваць стасункі з дзяржавай», адзначаюць суразмоўцы выдання. Раней газета пісала пра магчымую адстаўку куратара кібербяспекі ФСБ Андрэя Герасімава ў сувязі з расследаваннем УСБ у дачыненні да аднаго з яго намеснікаў.