У Літве вынеслі прысуд супрацоўнікам АМАП за падзеі 1991 года

Суд прыняў пастанову завочна праз 25 гадоў пасля тых падзей.

Праз больш чым 25 гадоў пасля трагічных падзей 1991 года, Літоўскі апеляцыйны суд завочна прыняў пастанову ў справе былога камандуючага АМАПу (атрада міліцыі асаблівага прызначэння) у Вільні Уладзіміра Разводава, піша delfi.lt.

Старшыня калегіі з трох суддзяў Сігіта Беляўскене 24 студзеня абвясціла, што Разводава прызналі вінаватым - яму прызначылі пакаранне ў выглядзе пазбаўлення волі на 12 гадоў. Яго асуджаны павінен правесці ў калоніі, калі яго затрымаюць.

Разводава прызналі вінаватым паводле 100 арт. Крымінальнага кодэкса ЛР - забароненае міжнародным правам абыходжанне з людзьмі - і паводле 103 арт. - прычыненне траўмаў, катаванне і іншае нечалавечае абыходжанне з людзьмі, якія знаходзяцца пад абаронай міжнароднага гуманітарнага права.

«Разводаў учыняў цяжкія наўмысныя злачынствы, ягоную адказнасць абцяжарвае тое, што злачынства ўчыненае групай асобаў небяспечным для грамадства спосабам з выкарыстаннем агнястрэльнай зброі», - сказана ў пастанове суда.

Разводаў таксама павінен выплаціць пацярпелым прычыненую шкоду - больш за 14 000 еўраў. Праўда, у некаторых эпізодах ён быў апраўданы за недахопам довадаў віны.

Да гэтага дня не дажыў іншы камандуючы АМАПам - Баляслаў Макутыновіч, які памёр у лістападзе 2015 года ў Расеі, таму ў яго дачыненні судовае разбіральніцтва было спыненае.

Праўда, суд не атрымаў афіцыйнага пацверджання смерці Макутыновіча, нягледзячы на тое, што і суд, і пракуратура неаднаразова звярталіся ў расейскія інстанцыі. Пра смерць Макутыновіча ў судзе паведаміла ягоная сястра, якая пражывае ў Літве, аднак яна сказала, што сама на пахаванне не ездзіла. Са слоў суддзяў, пра смерць Макутыновіча паведамлялі СМІ, аднак калі ў будучыні высветліцца, што ён усё ж такі жывы, то пракуроры змогуць разгледзець магчымасць аднаўлення працэсу.

У абвінаваўчым акце сцвярджалася, што Макутыновіч і Разводаў у 1991 годзе падтрымлівалі агрэсію Расеі супраць Літвы. Яны, на сцвярджэнні дзяржабвінаваўцы, спрабавалі сілай скінуць законную ўладу, удзельнічалі ў нападах на дзяржаўныя ўстановы, загадалі чальцам атрада, якімі камандаваў Эдуардас Петраўскас, выкарыстоўваць сродкі тэрору і запалохвання ў дачыненні да службовых асоб незалежнай Літвы. АМАПаўцы нападалі на паліцыянтаў, адбіралі службовую зброю, асабістыя рэчы, незаконна затрымлівалі людзей і дастаўлялі іх у захоплены будынак тагачаснай Акадэміі паліцыі Літвы.

Праваахоўныя органы сцвярджалі, што раскрылі 16 выпадкаў нападу на патрулі памежнікаў Літвы, захопу зброі, абстрэлу людзей.

Віленскі акруговы суд Вільні 4 чэрвеня 2015 года завочна апраўдаў двух былых камандзіраў віленскага АМАПу Макутыновіча і Разводава - якіх абвінавачвалі ў ваенных злачынствах і злачынствах супраць чалавечнасці.

Суд пастанавіў, што яны не маюць дачынення да штурму тэлецэнтра ў Вільні ў студзені і расстрэлу памежнага КПП Медзінінкай у ліпені 1991 г, і што, паводле міжнароднага права, судзіць за інкрымінаваныя ім злачынствы можна было б у тым выпадку, калі б яны былi ўкладзеныя ва ўмовах вайны або акупацыі. Літва ў той час ужо абвясціла сваю незалежнасць, але ў ёй яшчэ былі дыслакаваныя савецкія войскі.

Адказнасць за агрэсію, з высноваў суда, кладзецца на кіраўніцтва дзяржавы.

Пракуратура гэты прысуд абскардзіла ў Літоўскім апеляцыйным судзе і прасіла прысудзіць Макутыновіча і Разводава да 12 гадоў пазбаўлення волі кожнага, а таксама прысудзіць з іх кампенсацыю прычыненай шкоды ў грамадзянскіх пазовах. Паколькі паступілі звесткі пра смерць Макутыновіча, ягоная справа была закрытая.