Вайсковыя камісіі БНК сталі галоўнай навіной на Яндэксе

Навінавы агрэгатар Яндэкса зрабіў галоўнай навіной падзелу палітыкі навіну аб стварэнні вайсковых камісій Беларускага Нацыянальнага Кангрэсу.

Яндэкс зрабіў галоўнай навіной падзелу палітыкі хлуслівую навіну аб стварэнні «Правага сектара» ў Беларусі.

Як запэўнівае сам Яндэкс, навінавая сітуацыя дня фармуецца ў іх «без чалавечага ўмяшання». А ўсё, што бачыць у навінах карыстальнік у сябе на старонцы - «вынік працы алгарытмаў».

Робат, па ідэі, разлічвае «вагу» паведамлення на аснове трох крытэраў: яго цытавання ў іншых крыніцах, інфарматыўнасці і свежасці. Інфармацыя, піша Яндэкс, павінна быць «актуальнай, поўнай і праўдзівай», піша belaruspartisan.org.

У выпадку з навіной пра нібыта створаны ў Беларусі «Правы сектар» робат відавочна сеў у галёш.

Па-першае, сайт, на якім першапачаткова з'явілася навіна з загалоўкам аб стварэнні «Правага сектара», не мае ніякага дачынення да Беларусі. У сюжэце стаіць спасылка на «Звон Расіі», нацыянал-шавіністычны рэсурс з крыклівымі загалоўкамі тыпу «Пераемнік Пуціна далучыць да Расеі Каліфорнію». «Звон», у сваю чаргу, спасылаецца ў сваёй нататцы на сайт «Руская вясна» - прапагандысцкі рэсурс т.зв. «Наваросіі».

У Беларусі нататку, моцна яе скараціўшы, перадрукаваў усяго адзін рэсурс - НьюсБел.

«Правым сектарам» у гэтай навіне назвалі «рэгіянальныя вайсковыя камісіі», якія пастанавіў стварыць Беларускі Нацыянальны Кангрэс, пра што пісаў лідар беларускай апазіцыі Мікалай Статкевіч. Іх мэтай з'яўляецца правядзенне мерапрыемстваў у вайскова-патрыятычным выхаванні з мэтай падрыхтоўкі беларускіх грамадзян да выканання свайго абавязку для абароны незалежнасці Беларусі, аналіз настрояў вайскоўцаў і іх гатоўнасць абараняць краіну ад агрэсіі з усякага боку, а таксама дапамогу дзяржаўным органам у выпадку такой агрэсіі ў супрацьстаянні ёй.

Паводле звестак за снежань 2015 года (больш пазнейшых няма), наведвальнасць Яндекс.Новостей у Беларусі складала больш за 600 тысяч чалавек за месяц. Гэта без уліку наведванняў з мабільных прылад, а таксама тых, перад чыімі вачыма проста мільгаюць загалоўкі галоўных навін пры карыстанні браўзэрам, поштай і іншымі сэрвісамі Яндэкса.