Актывісты байкатуюць будаўніцтва кітайскага завода феерверкаў пад Магілёвам
8- 10.10.2017, 15:16
- 16,557
Актывіст Уладзімір Шанцаў мяркуе, што Беларусь ператвараюць у адсталую правінцыю Кітая.
Рэгіянальны лідар Аб'яднанай грамадзянскай партыі Уладзімір Шанцаў абвясціў пра збор подпісаў супраць будаўніцтва завода феерверкаў пад Магілёвам, паведамляе mspring.online.
Раней мясцовыя ўлады анансавалі з'яўленне піратэхнічнай вытворчасці ў Магілёўскім раёне. Інвестары з горада Чанша правінцыі Хунань гатовы стварыць замкнёны цыкл вырабу феерверкаў - ад пораху і кнотаў да корпуса прадукцыі. Гэтыя ж бізнэсоўцы арганізавалі нібыта бясплатны салют да 750-годдзя Магілёва ў ліпені гэтага года.
З разлікаў магілёўскіх уладаў, стварэнне піратэхнічнага завода дасць рэгіёну блізу дзвюх тысяч працоўных месцаў. Уладзімір Шанцаў уважае гэта за жульніцтва.
- У нашым рэгіёне і краіне можна было развіваць высокатэхналагічную вытворчасць, развіваць інфраструктуру. Замест гэтага нас ператвараюць у адсталую правінцыю Кітая. Вядома, бо прасцей адкрыць адзін завод, куды павінны пайсці асуджаныя беспрацоўем людзі, чым комплексна развязваць праблемы эканомікі, - мяркуе палітык.
Шанцаў называе вытворчасць небяспечнай і непатрэбнай. На ягоную думку, довадам гэтага з'яўляецца той факт, што завод стане першым у Еўропе.
- У еўрапейскі краінах умеюць ацэньваць рызыкі і выгаду, таму там такога завода няма. А ў нас будзе. Фактычна, гэта як мець парахавую бочку пад бокам, - сцвярджае абласны лідар АГП.
Палітык бачыць у з'яўленні завода прыкметы карупцыі:
- Спачатку нам сказалі, што на дзень горада нам падораць бясплатны прыгожы феерверк. Ён адгрымеў і вось праз некалькі месяцаў выяўляецца, што гэтыя ж людзі, якія падарылі феерверк, будуць будаваць небяспечнае вытворчасць пад Магілёвам. Гэта не зусім прыстойна, - ацаніў Уладзімір Шанцаў.
У найбліжэйшыя дні ён з маладымі калегамі актывізуюць збор подпісаў. Пры гэтым гэта толькі адна з грамадскіх кампаній, якімі занятыя сябры АГП, сцвярджае палітык:
- Таксама мы будзем судзіцца з гарадскімі ўладамі праз Святое возера, развязваць пытанне са спартовай залай ў СШ №11 і паспрабуем дамагчыся з'яўлення веласіпеднай дарожкі на пешаходнай вуліцы Ленінская, - сказаў на заканчэнне Шанцаў.