Свабодны прафзвяз папярэдзіў кіраўніцтва «Шкловалакна» пра страйк

Страйк полацкіх рабочых будзе доўжыцца да канца года.

Як распавёў «Радыё Свабода» Віктар Стукаў, кіраўнік суполкі Свабоднага прафзвязу беларускага, страйк на «Шкловалакне» павінен пачацца з 1-га лістапада і доўжыцца да канца года:

«Наш прафзвяз накіраваў дырэктару пісьмовае паведамленне пра страйк, як таго патрабуе артыкул 390 Працоўнага кодэкса. Пастанова аб неабходнасці страйкаваць была прынятая на канферэнцыі рабочых, якую зладзіла першаснае звяно. Але адказу мы не атрымалі: адміністрацыя прадпрыемства робіць выгляд, што СПБ «Шкловалакно» няма. Аргументуе тым, што нашы актывісты не плацяць унёскі праз бухгалтэрыю. Аднак мы спецыяльна перайшлі да фармату «нефіксаванага сяброўства», каб абараніць работнікаў ад ціску. У сувязі з нашым паведамленнем пра страйк мы не выключаем новых рэпрэсій».

Менавіта дыскрымінацыя паводле прафсаюзнай прыкметы стала прычынай будучага страйку, кажа Стукаў. Актывістаў СПБ не далучаюць да распрацоўкі нормаў калектыўнай дамовы, ігнаруюцца патрабаванні наконт умоваў працы, выказаныя прадстаўнікамі незалежнага прафзвязу. Найбольш актыўных сяброў проста звольнілі. Сам Віктар Стукаў з'яўляецца вызваленым старшынём прафсаюзнай арганізацыі: ён страціў працу ў 2013-м годзе. Вясной 2016 га быў звольнены ягоны намеснік Мікалай Шарах.

Як плануецца, страйк будзе «веерны»: работнікі будуць страйкаваць ва ўсякай прымальнай для сябе форме. Напрыклад, у асобнай брыгадзе людзі на знак пратэсту могуць працаваць вельмі марудна, ці хтосьці спыніць працу на пэўны перыяд. Такі фармат абароніць страйкоўцаў супраць абвінавачвання ў парушэнні вытворчага цыклу. Права на страйк мае кожны работнік згодна з артыкулам 391 Працоўнага кодэкса, і за парушэнне гэтага права з боку кіраўнікоў прадугледжаная крымінальная адказнасць.

Паралельна з падрыхтоўкай да страйку прафсаюзныя актывісты распачалі судовы працэс супраць дыскрымінацыі за ўдзел у незалежным прафзвязе. Сёлета ў верасні сябры СПБ збіраліся правесці пікет супраць пераследу лідараў прафзвязу РЭП Ігара Комлікa і Генадзя Фядыніча. Полацкі райвыканкам забараніў пікет, спаслаўшыся на закон аб масавых акцыях. Аднак актывісты намагаюць, што права ладзіць прафсаюзныя мерапрыемствы гарантаванае ім міжнароднымі дакументамі, згодна з якім улады не павінны ўмешвацца ў справы прафзвязаў.

З нагоды забароны Віктар Стукаў звярнуўся ў раённы суд, аднак там ягоную пазіцыю не падтрымалі, стаўшы на бок прадстаўнікоў улады. Прафсаюзны лідар мяркуе, што будзе аспрэчваць пастанову суда, і ў выніку неабходнасці гатовы дайсці аж да Камітэта ў правах чалавека ААН. Гэта першы прэцэдэнт, калі прыватная асоба бароніць свае правы на дзейнасць у складзе незалежнага прафзвязу.