ЗША і ЕЗ заклікалі варожыя ў Іраку бакі да міру

Багдад і курды павінны сесці за круглы стол перамоў.

Эскалацыя збройнага канфлікту ў Паўночным Іраку пагражае перарасці ў новую грамадзянскую вайну ў рэгіёне. ЗША і ЕЗ асцерагаюцца, што ад канфлікту здабудуць джыхадзісты з ІД, паведамляе "Нямецкая хваля".

У сувязі з эскалацыяй збройнага канфлікту ў Паўночным Іраку ЗША і Еўразвяз заклікалі ірацкую войска і фармавання курдаў спыніць гвалт і аднавіць спакой. "Мы вельмі ўважліва сочым за сітуацыяй і заклікаем усе бакі скаардынаваць ваенныя дзеянні і аднавіць спакой", - заявіла прадстаўнік Дзярждэпартамента ЗША Хезер Ноерт увечары ў панядзелак, 16 кастрычніка.

Ноерт падкрэсліла, што абодва бакі павінны пазбягаць правакацый, якімі могуць скарыстацца ворагі Ірака ў мэтах дэстабілізацыі краіны. Яна выказала асцярогу, што напружанасць паміж урадам у Багдадзе і курдамі адцягне ад барацьбы з тэрарыстычнай групоўкай "Ісламская дзяржава" (ІД).

ЗША абяцаюць нейтралітэт

Прэзідэнт ЗША Дональд Трамп заявіў, што ЗША не маюць намеру станавіцца на чый-небудзь бок у канфлікце паміж Багдадам і курдамі. "ЗША маюць вельмі добрыя стасункі і з цэнтральным урадам Ірака, і з курдамі. Нам наогул не варта было ўрывацца ў Ірак у 2003 годзе. Але мы не будзем станавіцца на чый-небудзь бок", - сказаў ён на прэс-канферэнцыі ў Вашынгтоне.

Вярхоўная прадстаўніца ЕЗ у замежнай палітыцы і бяспецы Федэрыка Магерыні пасля тэлефоннай размовы з прэм'ер-міністрам Ірака Хейдарам аль-Абадзі таксама заклікала бакі канфлікту да дыялогу і адмовы ад гвалту. Яна абвясціла аб адпраўцы ў Ірак новай цывільнай місіі, якая будзе падтрымліваць Багдад у грамадзянскіх аспектах нацыянальнай бяспекі.

Ірацкія жаўнеры 16 кастрычніка ўварваліся ў стратэгічна важны горад Кіркук у рэгіёне, падкантрольны ірацкім курдам. Яны таксама ўзялі пад кантроль будынак рэгіянальнай адміністрацыі, вайсковы аэрадром і размешчаны непадалёк нафтаносны раён Баба-Гургур. Курдскія фармаванні не далі ірацкім войскам практычна ніякага супраціву. У аўторак, 17 кастрычніка ўрадавыя войскі прасоўваліся ўглыб правінцыі Кіркук, якая з 2014 года кантралюецца курдамі.