У Берасці журналіст дапамог «раскаларадзіцца» кіроўцу грузавіка
13- 20.10.2017, 12:18
- 28,877
Кіроўцу аўтамабіля давялося зняць расейскі сцяг і георгіеўскую стужку.
Берасцейскі журналіст Алесь Ляўчук убачыў расейскі сцяг і георгіеўскую стужку на машыне берасцейскіх электрасетак і папрасіў кіроўцу прыбраць непажаданую ў Беларусі сімволіку з аўтамабіля.
Кіроўца адмовіўся, у выніку справа дайшла да выкліку міліцыі.
«Беларускія законы забараняюць размяшчаць на лабавой шыбе ўсялякія прадметы. Выклікаючы міліцыю, дзяжурны супрацоўнік доўга не хацеў адпраўляць аўтамабіль ДАІ, але ўсё ж дамогся. Потым не хацеў працаваць супрацоўнік ДАІ, які прыехаў, але ўсё ж, вывучыўшы заканадаўства - пачаў дзейнічаць. У выніку быў прапанаваны кампрамісны варыянт. Кіроўца здымае стужку і сцяг, я не намагаю на складанні пратаколу. Такі варыянт мяне задаволіў, бо сваіх мэт у гэтай сітуацыі я дасягнуў», - распавёў «Белсату» Алесь Ляўчук.
Апошнім часам даволі часта прадстаўнікі ўлады не рэкамендуюць выкарыстоўваць расейскі сцяг і георгіеўскую стужку, а ДАІ адназначна расцэньвае ўсялякія сімвалы на лабавой шыбе як парушэнне. За гэта можна атрымаць штраф.
У чэрвені пасля яшчэ адной скаргі Алеся Ляўчука на расейскі сцяг на машынах камунальнікаў, на кіроўцаў склалі пратакол і прыцягнулі да адміністрацыйнай адказнасці.
«Яна для нас небяспечная». Магілёвец змагаецца з георгіеўскай стужкай
Кіроўца з Магілёва атрымаў штраф за георгіеўскую стужку на шыбе аўтамабіля
Аб непрымальным выкарыстанні расейскага сцяга гаворыцца ў афіцыйных адказах бабруйскай прыватнай фірмы і берасцейскага дзяржаўнага транспартнага прадпрыемства.
Нагадаем, што памаранчава-чорную стужку, якую ў Расеі называюць «георгіеўскай», пачалі негалосна пазбягаць у Беларусі праз год пасля таго, як яна фактычна стала сімвалам расейскіх акупантаў і прарасейскіх сепаратыстаў ва Украіне.