Звольнены начальнік 72-га аб'яднанага вучэбнага цэнтра ў Печах
57- 20.10.2017, 19:42
- 61,502
Палкоўнік Чарнецкі папоўніў спіс адхіленых ад пасады вайскоўцаў.
Палкоўнік Канстанцін Чарнецкі вызвалены ад пасады начальніка 72-га гвардзейскага аб'яднанага вучэбнага цэнтра падрыхтоўкі прапаршчыкаў і малодшых спецыялістаў Узброеных сіл, піша tut.by.
Падчас расследавання крымінальнай справы паводле факта смерці радавога Аляксандра Коржыча былі ўсталяваныя выпадкі парушэння статутных правілаў узаемаадносін паміж вайскоўцамі навучальнага цэнтра.
«Гэта стала магчымым у выніку адыходу і безадказнага стаўлення шэрагу службовых асоб цэнтра да выканання сваіх службовых абавязкаў, а таксама адсутнасці кантролю за падтрыманнем воінскай дысцыпліны і правапарадку ў падпарадкаваным злучэнні з боку яго начальніка палкоўніка Канстанціна Чарнецкага», - гаворыцца ў паведамленні.
Канстанцін Чарнецкі - патомны вайсковец. Скончыў Маскоўскую вышэйшую агульнавайсковую камандную вучэльню і атрымаў размеркаванне ў Чырванасцяжную Беларускую вайсковую акругу. Быў камандзірам самай першай роты ганаровай варты Узброеных сіл Беларусі. Да прызначэння ў 72 АНЦ займаў пасаду начальніка факультэта падрыхтоўкі замежных вайскоўцаў Вайсковай акадэміі - намесніка начальніка акадэміі (у міжнародным супрацоўніцтве).