У беларускіх аграгарадках пачаліся бунты

Работнікі аднаго з аграгарадкоў атрымліваюць па $25, нязгодных робяць «дармаедамі».

Бунт у аграгарадку: цярпенне працаўнікоў сельскагаспадарчага кааператыву «Крыўск», што месціцца ў аднайменным паселішчы, лопнула: ні з пушчы ні з поля заробкі знізіліся ў разы, а гаспадарка да прыходу маразоў апынулася непадрыхтаваная, паведамляе «Белсат».

Накіпела

«Хлявы раскіданыя, каровы стаяць мерзнуць як страусы на адной назе, заробкі ўрэзалі, як пашумелі – зарплата нам да 0, па 50 рублёў на рукі».

«У нас дэталяў няма, у нас аліва няма, машыны якія развальваюцца».

«З працы выганяць – дармаед, плаці за беспрацоўе, а чым ты будзеш плаціць, калі не даюць працаваць? А калі праца ёсць, то няма годнай аплаты. 150 рублёў – як за гэтыя грошы пражыць, як за гэта сям’ю пракарміць? І за гэтыя грошы змагацца. Дзе 1000 рублёў абяцаныя?»– абураюцца працаўнікі прадпрыемства.

Да дырэктара журналістаў «Белсату» не пусцілі

Аднак начальнік аховы прадпрыемства, які таксама пагражаў звальненнямі незадаволеным, пра заняпад гаспадаркі нічога не чуў.

На бок працаўнікоў стаў галоўны аграном прадпрыемства Міхаіл Вар’яновіч – але дырэктар, са слоў Міхаіла, у адказ на заўвагі і яму пачаў пагражаць звальненнем.

Механізатары і кіроўцы папярэджваюць: калі сітуацыя на прадпрыемстве не зменіцца, а пагрозы звальнення працягнуцца, супрацоўнікі паедуць у Менск наўпрост да Лукашэнкі.