Справа аб дзедаўшчыне ў Печах: Аднаго афіцэра адпусцілі на свабоду

Дзесяці вайскоўцам з часткі Аляксандра Коржыча выстаўлена абвінавачванне.

Абвінавачванне выстаўлена дзесяці фігурантам крымінальнай справы аб загубе салдата ў Печах. Адзін з затрыманых афіцэраў адпушчаны на волю.

Як стала вядома tut.by, адзін з двух затрыманых афіцэраў, капітан Чыркоў больш не знаходзіцца ў следчым ізалятары, цяпер ён на свабодзе. Гэтую інфармацыю пацвердзілі ў СК.

- Цяпер выстаўлена абвінавачванне дзесяці вайскоўцам: 8 сяржантам, прапаршчыку і афіцэру. Яшчэ адзін афіцэр знаходзіцца ў статусе падазраванага, да яго ўжытая мера працэсуальнага прымусу – абавязак аб прыходзе. Высвятляецца дачыненне іншых асоб да ўчынення злачынства, - пракаментавала Юлія Ганчарова, афіцыйная прадстаўніца Следчага камітэта.

Нагадаем, 3 кастрычніка ў Печах знайшлі цела 21-гадовага салдата Аляксандра Коржыча. Першапачаткова праваахоўныя органы паведамлялі, што асноўнай версіяй таго, што здарылася яны лічаць суіцыд. Аднак пасля Следчы камітэт пачаў некалькі крымінальных спраў паводле артыкулаў «махлярства», «парушэнне статутных стасункаў» і «злоўжыванне ўладай». У Печах былі затрыманыя 10 чалавек.

- Гэта 2 афіцэры - старшы лейтэнант Сукавенка і капітан Чыркоў, прапаршчык Артур Вірбал, 2 сяржанты 3-я школы - Ягор Скуратовіч і Яўген Бараноўскі, а таксама 5 сяржантаў 307-й школы – распавядае ананімная крыніца ва Узброеных сілах.

Днямі старшыня СК Іван Наскевіч распавёў журналістам аб атрыманых звестках судова-медыцынскай экспэртызы аб справе загінулага ў Печах.

- На целе Коржыча не было іншых пашкоджанняў, акрамя странгуляцыйнай баразны (след на шыі ў павешаных або задушэнне ў пятлі), - адзначыў Іван Наскевіч і пры гэтым дадаў, што сінякі, пра якія кажуць родныя загінулага - гэта трупныя плямы.

Расследаванне крымінальнай справы доўжыцца.