Стала вядома, якімі будуць тарыфы ЖКГ

У Беларусі распрацавалі новыя дыферэнцыраваныя тарыфы на паслугі ЖКГ для насельніцтва.

Праект дакумента «Тарыфны сшытак» быў разасланы ў бізнэс-саюзы для ўзгаднення і збору прапаноў і будзе пададзены Лукашэнку. Finance.tut.by паглядзеў, якія новыя тарыфы на жыллёва-камунальныя паслугі могуць увесці ў Беларусі.

Тарыфны сшытак, як адзначаецца ў праекце дакумента, распрацавалі для фармавання «празрыстай» тарыфнай палітыкі на ЖКП.

Так, цяпер кошт паслуг па тэхабслугоўванню жылога дома залежыць ад колькасці паверхаў, ад наяўнасці інжынерных сістэм. Прапануецца ж увесці дыферэнцыраваныя тарыфы на гэтыя паслугі ў наступных групах дамоў: аднакватэрныя і блакаваныя жылыя дамы; шматкватэрныя жылыя дамы малой і сярэдняй паверхавасці (1-5 паверхаў); шматкватэрныя шматпавярховыя жылыя дамы (6-10 паверхаў); шматкватэрныя жылыя дамы падвышанай паверхавасці (11 паверхаў і вышэй).

Тарыф на водазабеспячэнне хочуць прывязаць да якасці вады

Прапануецца ўвесці розныя тарыфы па водазабеспячэнню для тых, хто жыве ў прыватных дамах і шматкватэрных дамах. У другім выпадку кошт паслугі водазабеспячэння вышэйшы, чым у першым.

У Беларусі таксама хочуць дыферэнцаваць тарыф на водазабеспячэнне таксама ў залежнасці ад якасці вады. «Падача вады, якая не адпавядае па якасных параметрах, змушае ўсталёўваць і ў далейшым абслугоўваць розныя фільтры, якія патрабуюць дадатковых укладанняў альбо набываць ваду ў бутэльках», - гаворыцца ў тэксце прапаноў.

Тарыф з павышаючым каэфіцыентам на водазабеспячэнне хочуць увесці і для тых, хто не ўсталяваў лічыльнікі вады (пры наяўнасці тэхнічнай магчымасці яго ўстаноўкі).

«Пры разліку платы за паслугі водазабеспячэння і водаадвядзення прапануецца захаваць дзейны дыферэнцыраваны падыход пры ўжыванні тарыфаў у залежнасці ад аб'ёмаў спажывання. Пры гэтым плату за спажыванне вады звыш устаноўленай нормы (140 літраў на дзень на аднаго зарэгістраванага) браць адпаведна з тарыфам з павышаючым каэфіцыентам 1,3», - гаворыцца ў праекце дакумента.

Чым больш энэргаэфектыўны дом - тым меншая аплата за ацяпленне

Тарыф на цеплазабеспячэнне хочуць дыферэнцаваць у залежнасці ад наяўнасці і выкарыстання прыбораў індывідуальнага ўліку цяпла, а таксама ў залежнасці ад энэргаэфектыўнасці жылога дома.

Прапановы што да электраэнэргіі

«У 2018 годзе для выкарыстання электрычнай энэргіі для мэт нагрэву прапануецца забяспечыць зніжэнне тарыфаў да ўзроўню эквівалентнага кошту цеплавой энэргіі на гэтыя мэты», - гаворыцца ў праекце дакумента аб электраэнэргіі. Пры гэтым выпадаючыя праз гэтае магчымае новаўвядзенне даходы энэргазабеспячальных арганізацый «Белэнэрга» прапануецца кампенсаваць з дзяржбюджэту.

Тарыфаў на аплату электраэнэргіі як у залежнасці ад аб'ёмаў спажывання, так і ад часу дня маюць намер пакінуць.

Чым вышэйшы паверх, тым большая сума за ліфт у рахунку

Цяпер за паслугі ліфта плацяць жыхары другога паверха і вышэй. Кошт тэхабслугоўвання ліфта залежыць ад паверхавасці дома. «У сувязі з гэтым прапануецца ўстанаўліваць тарыфы ў залежнасці ад паверхавасці дома. Так, прапануецца ўстанаўліваць тарыфы для шматкватэрных жылых дамоў - да 9 паверхаў (уключна) за 1 ліфт і на 1 чалавека. Пры гэтым рэкамендуецца ўстанаўліваць папраўчы каэфіцыент на кожны паверх звыш (ніжэй) 9 паверхаў.

Санітарнае ўтрыманне дапаможных памяшканняў жылога дома

Цяпер кошт гэтай паслугі не падлягае дзяржаўнаму цэнаваму рэгуляванню. Урад толькі рэкамендуе гранічныя значэнні кошту іх надання насельніцтву. Прапануецца ж увесці тры тарыфу ў залежнасці ад пераліку паслуг і перыядычнасці іх надання.

Нагадаем, інфармацыю пра магчымы ўвод дыферэнцыраваных тарыфаў раней агучваў намеснік міністра антыманапольнага рэгулявання і гандлю (МАРГ) Іван Вежнавец.

- З улікам таго, што ў большасці ЖКП мы выходзім на 100-адсоткавы ўзровень кампенсацыі, індэксацыя на намінальны заробак, якая праводзіцца сёння, да іх паводле заканадаўства ўжывацца не можа. Разам з тым з часам мы можам сутыкнуцца з тым, што выдаткі на наданне гэтых паслуг вырастуць і дасягнуты ўзровень 100-адсоткавай кампенсацыі выконвацца не будзе, - адзначыў Іван Вежнавец.

Спецыяліст паведаміў, што супольна з Міністэрствам жыллёва-камунальнай гаспадаркі МАРГ распрацоўвае падыходы па магчымай індэксацыі тарыфаў у залежнасці ад выдаткаў, якія ўваходзяць у пэўную паслугу. Прапановы будуць накіраваныя на разгляд Лукашэнкі, бо для разліку тарыфаў спатрэбіцца змяніць базавую адзінку.