У Полацку паставілі помнік матэматычнай формуле

Інсталяцыя вышынёй 2,5 метра можа стаць новай славутасцю горада.

Незвычайная інсталяцыя з'явілася ў Полацку. У дзень студэнта тут адкрылі помнік матэматычнай формуле. Гэта «ГіПар» – гіпербалічны парабалоід двайной крывізны Гаўса. Ідэя праекта нарадзілася ў Полацкім дзяржаўным універсітэце, і над яе рэалізацыяй працаваў калектыў ПДУ, паведамляе kp.by.

– Гэта адзіная падобнага кшталту скульптурная кампазіцыя ў Беларусі, якая аб'ядноўвае ў сабе сучаснае мастацтва і навуку. З аднаго боку – гэта скульптурная кампазіцыя і інсталяцыя, а з другога боку – візуальная рэалізацыя матэматычнай формулы, – распавёў аўтар праекта дацэнт кафедры архітэктуры Віктар Лук'яненка.

Ва ўніверсітэце мяркуюць, што інсталяцыя, вышыня якой 2,5 метра, можа стаць новай славутасцю горада і будзе цікавая не толькі палачанам, але і турыстам.