СК прадоўжыў расследаванне паводле справы Максіма Мархалюка
1- 27.11.2017, 14:50
- 14,379
Зніклага ў Белавежскай пушчы хлопчыка шукаюць ужо больш за два месяцы.
Следчы камітэт прадоўжыў да чатырох месяцаў тэрмін папярэдняга расследавання ў крымінальнай справе паводле факта знікнення Максіма Мархалюка з вёскі Новы Двор Свіслацкага раёна. Прычынай гэтага стала неабходнасць ажыццявіць значны аб'ём следчых і іншых працэсуальных дзеянняў, паведамляецца на сайце Следчага камітэта, піша «Еўрарадыё».
Адзначаецца, што следчыя разам з супрацоўнікамі МУС, органамі мясцовага самакіравання, МНС, Мінабароны правялі вялікую працу, каб высветліць месцазнаходжанне зніклага хлопчыка.
Прадаўжаецца пошук у меркаваным кірунку руху хлопчыка - па забалочанай мясцовасці ляснога масіву Нацыянальнага парка «Белавежская пушча».
Мархалюка абвясцілі ў міжнародны вышук. Следчыя аналізуюць і правяраюць усякую інфармацыю, у тым ліку тую, што з'яўляецца ў СМІ і інтэрнэце.
10-гадовы хлопчык 16 верасня пайшоў у грыбы ў пушчу і знік. У ягоных пошуках удзельнічалі мясцовыя жыхары, выратавальнікі, міліцыянты, вайскоўцы, валанцёры і нават экстрасэнсы.