Енс Столтэнберг застанецца генсекам NATO да 2020 года

Гэту пастанову краіны NATO прынялі аднагалосна.

Енс Столтэнберг застанецца на пасадзе генеральнага сакратара NATO да 2020 года. Такая пастанова была аднагалосна прынятая на пасяджэнні Паўночнаатлантычнай рады ў аўторак, 12 снежня. Тэрмін паўнамоцтваў Столтэнберга павінен быў скончыцца 30 верасня 2018 года, паведамляе «Нямецкая хваля».

«Хаўруснікі віншуюць генеральнага сакратара і цалкам упэўненыя ў ягонай здольнасці прадаўжаць сваю добрасумленную працу, накіраваную на павышэнне гатоўнасці NATO да выклікаў бяспецы XXI стагоддзя», - паведамілі ў Паўночнаатлантычнай радзе.

Столтэнберг быў абраны генсекам NATO ў 2014 годзе, змяніўшы на гэтай пасадзе Андэрса Фога Расмусэна. 58-гадовы дыпламаваны эканаміст узначальваў урад Нарвегіі ў 2000-2001 і 2005-2013 гадах. У сваёй палітычнай кар'еры ён, акрамя іншага, таксама займаў пасаду міністра фінансаў і міністра гандлю і прамысловасці.