У менскай шматпавярхоўцы вада з-пад крана б'е токам
24- 14.12.2017, 19:00
- 22,486
Жыхары набіраюць ваду ў гумовых тапках і пальчатках.
З незвычайнай праблемай на прамую лінію, якую праводзіў намеснік кіраўніка адміністрацыі Кастрычніцкага раёна Менска Аляксандр Астаповіч, патэлефанавала жыхарка дома №52 на вул. Сярова. Яна распавяла, што ў яе ў ваннай вада відавочна пад напругай, піша kp.by.
- Прыходзіцца ў гумовых тапках і пальчатках ваду набіраць. Асцерагаюся, каб чаго не здарылася - напружанне не смяротнае, але адчувальнае, - паскардзілася жанчына.
Мы патэлефанавалі іншым жыхарам гэтага дома і спыталі, ці б'ецца токам вада ў іх.
- Накшталт нічога такога ў нас няма, звычайная вада, - упэўненая іншая жыхарка дома №52 на Сярова. Потым такі ж адказ, маўляў, нічога незвычайнага не заўважылі, мы атрымалі яшчэ ад чалавек пяці з гэтага ж дома.
- Так, заўважала такое! - нарэшце пацвердзіла яшчэ адна жыхарка дома. - Я нават тэлефанавала ў дыспетчарскую нашага ЖЭСа, каб спытаць, што з гэтым рабіць. Там сказалі, што ўжо праблему ведаюць і пытанне вырашаецца.
Мы датэлефанаваліся і камунальнікам. Яны былі ў курсе праблемы і ўжо нават праводзяць сваё расследаванне незвычайнага выпадку:
- Мы разбіраемся з гэтай праблемай, - запэўніў нас галоўны інжынер УП «Жыллёвае камунальная гаспадарка Кастрычніцкага раёна горада Менска» Зміцер Ліпніцкі. - На днях мы праводзілі работы па адключэнні жылога дома ад сеткі электразабеспячэння. Пасля адключэння вада ўсё роўна заставалася пад напругай. Гэта сведчыць аб тым, што праблема не ў энергазабеспячэнні жылога дома. Хутчэй за ўсё, недзе провад пашкоджаны і ідзе прабой на корпус труб. Мы ўжо напісалі ліст у РЭС (раённыя электрычныя сеткі. - Рэд.), каб яны абследавалі кабелі, якія знаходзяцца ў іх на балансе.
Як хутка вырашыцца пытанне з «электрычнай» вадой, пакуль не вядома.
- Тэрмінаў я вам назваць не магу. Абсталяванне, якое абслугоўваем мы, знаходзіцца ў спраўным стане. А за вонкавыя сеткі мы не адказваем, - сказаў галоўны інжынер.