Мікалай Статкевіч: Я ганаруся беларусамі!
38- 17.02.2017, 19:24
- 43,530
Тысячы людзей прыйшлі 17 лютага на Марш абураных беларусаў у Менску.
Адзін з арганізатараў акцыі, лідар Беларускага Нацыянальнага Кангрэсу Мікалай Статкевіч, каментуючы Марш абураных беларусаў, які прайшоў сёння заявіў:
- Я ганаруся беларусамі, бо нягледзячы на больш як 20 гадоў ціску, рэпрэсій, звальненняў, турмаў, я бачу, што грамадства ёсць, нацыя прачынаецца.
Я ганаруся, што гэтыя людзі на наш заклік прыйшлі сюды, што яны даверылі мне і маім калегам прадстаўляць іх інтарэсы, - сказаў Мікалай Статкевіч.
- Што вы думаеце пра сам дэкрэт? Вы самі, дарэчы, не «дармаед»?
- Я вайсковы пенсіянер. Мяркую, што гэта дэкрэт, які працуе на знішчэнне нацыі. Ён, па сутнасці, кажа тым, хто яшчэ можа з'ехаць і ў яго няма нармальнай працы - уцякайце адсюль, едзьце. Як гаворыцца, разумныя – на Захад, а моцныя – на Усход. А тым, у каго няма сілы з'ехаць, ён кажа – памірайце. Гэта злачынны дэкрэт, які накіраваны супраць нашай нацыі.
Я не ведаю, якія матывы былі ў тых, хто яго прымаў. Такое ўражанне, што яны проста з нас здзекуюцца.
Мы даем уладам месяц, паглядзі, што яны будуць рабіць.
Калі ўлады не скасуюць ганебны дэкрэт, не адмовяцца ад незаконных пабораў, мы збярэмся разам яшчэ раз 25 сакавіка.
У Дзень Волі 25 сакавіка прыводзьце з сабой сяброў, знаёмых, кожны хай абтэлефануе некалькі дзясяткаў чалавек.
Калі на Дзень Волі нас збярэцца ў 10 разоў больш, чым сёння, мы не толькі гэты дэкрэт скасуем, мы адправім у адстаўку гэтага хама, які ўжо 20 гадоў сядзіць на нашай шыі.