Даля Грыбаўскайтэ: Літва павінна атрымаць яшчэ большую падтрымку NATO і ЗША

Усходні фланг павінен стаць ключавым напрамкам для Альянсу.

Літва разлічвае на яшчэ больш шырокую вайсковую дапамогу ад ЗША і на далейшае ўмацаванне усходняга флангу NATO. Пра гэта заявіла прэзідэнт Літвы Даля Грыбаўскайтэ на сустрэчы лідараў трох балтыйскіх дзяржаў з віцэ-прэзідэнтам ЗША Майкам Пенсам у рамках Мюнхенскай канферэнцыі ў бяспецы ў суботу, 18 лютага, паведамляе DW.

Важна ўлічыць, што NATO і войскі ЗША сканцэнтраваны ў асноўным у Заходняй Еўропе, а не на ўсходніх межах, якія між тым знаходзяцца ў найбольшай небяспецы, падкрэсліла Грыбаўскайтэ па заканчэнні гэтай сустрэчы ў інтэрв'ю агенцтву BNS. Яна выказалася за неабходнасць паскорыць працэс прыняцця пастаноў у рамках Паўночнаатлантычнага альянсу.

«Без падтрымкі амерыканскіх сістэм супрацьпаветранай абароны ў нас не будзе паўнавартаснай абароны», - заявіла прэзідэнт Літвы ў інтэрв'ю агенцтву AFP. На яе думку, пастановы, прынятыя на ліпеньскім саміце NATO, сёння ўжо недастатковыя.

На саміце NATO ў Варшаве ў ліпені 2016 года было наважана пашырыць вайсковую прысутнасць Паўночнаатлантычнага альянсу ў Латвіі, Літве, Эстоніі і Польшчы, размясціўшы ў гэтых краінах па аднаму батальёну колькасцю да 1000 вайскоўцаў.

У рамках гэтага рашэння ЗША ў красавіку накіруюць у Польшчу воінскі кантынгент, асабісты склад якога будзе налічваць блізу 1000 жаўнераў і афіцэраў. Як паведаміла ўвечары 18 лютага размешчаная ў Вісбадэне штаб-кватэра сіл ЗША ў Еўропе, ён будзе размешчаны ў раёне горада Ожэшы на паўночным усходзе Польшчы. У Літве ўжо дыслакаваны батальён пад камандаваннем NATO бундэсвера.