На «Еўравізію 2017» ужо прадалі больш за 11 тысяч квіткоў

За тры дні ад старту продажу квіткоў на «Еўравізію 2017» амаль пятую іх частка раскупілі.

Паводле стану на 17 лютага агульныя продажы квіткоў на «Еўравізію 2017» склалі 11 019 адзінак, у гэтую лічбу не ўваходзяць закрытыя продажы для фан-клубаў, паведамляе агенцтва «Укрінфарм» са спасылкай на звесткі афіцыйнага білетнага агента конкурсу ў Кіеве Concert.ua.

Адзначаецца, што ўжо раскупілі амаль пятую частку квіткоў.

«На сённяшні дзень прапрацоўваюцца квоты і заяўкі на квіткі ад дэлегацый, спонсараў, пасольстваў краін-удзельніц, партнёраў конкурсу. Цяпер вызначаецца рэшта квіткоў. Інфармацыя пра гэта будзе апублікаваная пасля 21 лютага на сайце «Еўравізіі» і на старонках мерапрыемствы ў Facebook», - гаворыцца ў паведамленні.

Першая партыя квіткоў на «Еўравізію2017» паступіла ў продаж увечары 14 лютага. Іх кошт, у залежнасці ад мерапрыемства, складаў ад €8 да €500. Квіткі на фінал конкурсу раскупілі за 15 хвілін.

Украіна атрымала права на правядзенне «Еўравізіі 2017» пасля перамогі Джамалы з песняй «1944» на конкурсе 2016 года. Конкурс пройдзе ў Міжнародным выставачным цэнтры Кіева.

Беларусь на песенным конкурсе прэзентуе група Navi.

Улады горада прагназуюць, што на «Еўравізію» ва Украіну прыедзе амад 20 тысяч іншаземцаў.