Расейцу забаранілі фатаграфаваць у Беларусі гарэлку і сала
17- 2.02.2017, 12:47
- 11,329
У крамах як толькі заўважалі фотаапарат, адразу з'яўляліся ахоўнікі са спалоханымі тварамі.
Вядомы філосаф і журналіст Максім Гаруноў з Расеі, прыехаўшы ў Беларусь, сутыкнуўся з тым, што яму паўсюль забаранялі фатаграфаваць, нават гарэлку і сала.
Пра гэта Максім Гаруноў напісаў на сваёй старонцы ў Facebook.
«У Беларусі, дарэчы, ёсць такая тэма: падыходзіш да чаго заўгодна, дастаеш фотаапарат, наводзіш, і адразу аднекуль з нябыту вынырвае чалавек са спалоханым тварам:
— Нельга фатаграфаваць! Забаронена!
Сёння раніцай у аэрапорце фатаграфаваў бутэльку прэміяльнай гарэлкі «Чорны Лебедзь» — падбегла дзяўчына ў форме:
— Нельга-нельга, вы што!
— Дарагая, — кажу я ёй, — гэта ж проста гарэлка. Водка.
— І што? Нельга! Неадкладна спыніце! — гляджу на яе са здзіўленнем. — Спыніце! — Тупнула ножкай.
Прыкінуў у галаве моц КДБ, плячыстую ахову, вусы — прыбраў планшэт ад граху падалей.
Самае смешнае было на Камароўскім рынку.
Камароўка — гэта як Бессарабка у Кіеве і Данілаўскі ў Маскве: горы мяса, тварагу, зеляніны, гародніны і іншага.
Сярод цётак, якія гандлююць каўбасой і салам, знайшоў самую прыгожую: чысты фартушок, чысты чэпчык; дагледжаная, з падбародкамі, у вушах залатыя завушніцы.
Пры дрэнным асвятленні, у абрамленні штабялёў з сала, атрымліваўся Рэмбрандт.
Толькі я навёў камеру, толькі адчуў зараджэнне шэдэўру — у спіну ветліва пастукалі.
Абарочваюся — ахоўнік. Твар грозны, як на савецкіх помніках, пафарбаваных срэбнай фарбай.
— Тут нельга фатаграфаваць
— Сала?
— Нельга.
— Сала, шаноўны?
— Я зараз начальніка аховы паклічу, ён патлумачыць.
— Кліч.
Ён сышоў. І я сышоў. А прыгожая ў асяроддзі сала засталася. Часта думаю пра тое, як яна там, неўвасобленая?».