29 сакавiка 2024, Пятніца, 5:05
Падтрымайце
сайт
Сім сім,
Хартыя 97!
Рубрыкі

Уначы невядомыя напалі на абаронцаў Курапатаў

62
Уначы невядомыя напалі на абаронцаў Курапатаў

Нападнікі былі ў масках і з дубінкамі.

Уначы 23 лютага на лагер актывістаў ля Курапатаў напалі невядомыя ў масках з драўлянымі завостранымі палкамі, паведамляе «Радыё Свабода».

Нападнікаў было ад 15 да 20 чалавек. Са слоў актывістаў, напад доўжыўся блізу хвіліны: невядомыя лаяліся, выкрыквалі «Слава Расеі» і «Белая раса».

Нападнікі разбурылі палатку, сарвалі бел-чырвона-белыя сцягі і перакулілі бочку, у якой актывісты развялі вогнішча. Адзін з актывістаў лагера, Алесь Кіркевіч, пацярпеў - яго ўдарылі драўлянай бітай па скроні. Пасля гэтага нападнікі схаваліся.

На думку прадстаўнікоў «Маладога фронту», гэта была спланаваная акцыя, мэта якой - запалохаць актывістаў. На месца здарэння была выкліканая міліцыя.

У лагер прыехалі старшыня Партыі БНФ Аляксей Янукевіч і лідар «Маладога фронту» Зміцер Дашкевіч. Разам з актывістамі яны абмяркоўваюць план далейшых дзеянняў. Згортваць лагер яны не маюць намеру.

У ГУУС Менгарвыканкама пракаментавалі сітуацыю.

«Сёння а 5.35 на спецлінію 102 паступіла паведамленне аб тым, што блізу 4 гадзін раніцы на грамадзян (у колькасці 15 чалавек) у Савецкім раёне сталіцы напалі два дзясяткі невядомых асобаў. Да месца здарэння неадкладна быў накіраваны патруль супрацоўнікаў міліцыі Савецкага РУУС Менска, былі праведзеныя папярэднія праверачныя мерапрыемствы. Паводле стану на 9 гадзін раніцы грамадзяне, якія звярнуліся ў міліцыю, ад напісання заяў і ад якіх-небудзь тлумачэнняў адмовіліся. Разам з тым паводле іх звароту ў міліцыю праводзіцца праверка», - распавёў tut.by афіцыйны прадстаўнік ГУУС Менгарвыканкама Аляксандр Ластоўскі.

Нагадаем, ужо некалькі дзён прадаўжаецца акцыя пратэсту на будоўлі на вуліцы Мірашнічэнкі. На гэтым месцы павінны пабудаваць пяціпавярховы бізнэс-цэнтр. Актывісты «Маладога фронту» выступаюць супраць - да 2014 года гэты пляц быў у межах ахоўнай зоны Курапатаў. Потым ахоўную зону істотна зрэзалі. Са слоў гісторыка Ігара Кузняцова, вялікая імавернасць, што на месцы будаўніцтва могуць быць пахаванні.

Напісаць каментар 62

Таксама сачыце за акаўнтамі Charter97.org у сацыяльных сетках