Дзень нараджэння Малевіча ў Віцебску адзначылі выставай

Свае работы для праекта прэзентавалі віцебскія мастакі.

Выставачны праект Constructio, прысвечаны мастаку, педагогу, тэарэтыку мастацтва, філосафу Казіміру Малевічу і прымеркаваны да ягонага дня нараджэння (23 лютага 1879 года), адкрыўся сёння ў філіяле Віцебскага цэнтра сучаснага мастацтва «АРТ-прастора «Талстога,7», паведамляе БелТА.

«Гэты праект не столькі для нас, мастакоў, колькі для асветы жыхароў горада, таму што ў шырокай публіцы нават з нагоды такой вядомай асобы, як Казімір Малевіч, вельмі шмат пытанняў, - патлумачыла куратар праекта Галіна Васільева.- У дзень нараджэння мастака, у памяць аб ім мы спрабуем калі не адказаць на гэтыя пытанні, то хоць бы падвесці чалавека да самастойнага ўсведамлення каштоўнасці яго творчасці, а таксама ролі мастацкіх адкрыццяў авангарднага мастацтва пачатку ХХ стагоддзя, між іншым, супрэматызму. А таксама пазнаёміць гледачоў з творчасцю сучаснікаў, якія дзеюць пад уплывам тых ідэй».

Свае работы для праекта прэзентавалі віцебскія мастакі: арганізатар творчага аб'яднання «Квадрат» Аляксандр Малей, аўтар і куратар штогадовага праекта Abstract Васіль Васільеў, а таксама Аляксандр Сляпаў, Анастасія Ганчарова, Кірыл Дземчаў, Антаніна Фалей, Генадзь Фалей, Таццяна Маклецова.

«Гэта ўжо легенды нашага горада. Вядома, яны развілі ідэі, закладзеныя ў мінулым стагоддзі, і ствараюць ужо сваё мастацтва. Але і яго, як і творчасць Малевіча, простымі словамі не растлумачыць. Наогул, у такім кірунку - канструктыўным - працуюць адзінкі. Гэта не поп-культура. Таму тое, што ў Віцебску ўтварылася цэлая група такіх людзей, унікальна», - заключыла Галіна Васільева.

Віцебск заняў важнае месца ў біяграфіі Казіміра Малевіча. Прыехаўшы сюды ў 1919 годзе ў якасці выкладчыка Віцебскага народнага мастацкага вучылішча, ён працаваў у горадзе тры гады. Менавіта ў Віцебску Малевіч напісаў свае лепшыя тэарэтычныя працы, цалкам рэалізаваў распрацаваную ім педагагічную праграму.