На задворках «БелЭкспа» знайшлася вядомая скульптура Меркурыя

Да красавіка 2013 года абеліск са скульптурай старажытнага рымскага бога гандлю знаходзіўся ля будынка «БелЭкспа» на праспекце Пераможцаў.

На днях ля адміністрацыйнага будынка нацыянальнага выставачнага цэнтра «БелЭкспа» на Янкі Купалы, 27 мы выявілі знайшлі ля сцяны скульптуру Меркурыя і яе пастамент. Да 2013 года ён знаходзіўся ля будынка «БелЭкспа» на праспекце Пераможцаў, 14. Мы ўспомнілі, пры якіх абставінах абеліск дэмантавалі, і даведаліся, чаму цяпер пашкоджаная скульптура міфічнага бога гандлю валяецца на задворках, паведамляе tut.by.

Да красавіка 2013 года абеліск са скульптурай старажытнага рымскага бога гандлю Меркурыя знаходзіўся ля будынка «БелЭкспа» на праспекце Пераможцаў. Пасля таго, як на гэтым месцы наважылі стварыць плошчу чырвона-зялёнага сцяга, Меркурыя дэмантавалі і на яго месца ўсталявалі 70-метровы флагшток.

Кіравала працамі для добраўпарадкавання гэтай тэрыторыі галоўны архітэктар праектаў майстэрні ландшафтнай архітэктуры УП «Мінскпраект» Ганна Аксёнава. Паводле яе слоў, у праекце было прапісана, што пасля дэмантажу скульптуры яе ўсталююць перад новым будынкам выставачнага павільёна, які хочуць пабудаваць на вуліцы Кіжаватава. А пакуль яна павінна знаходзіцца ў сховішчы ўласнікаў - «БелЭкспа».

У адміністрацыі «БелЭкспа» нам растлумачылі, што пра скульптуру не забыліся, а з сховішчы яе выставілі на час пераезду.

- Яна ляжыць там, бо буйнагабарытная - у кантэйнер не змяшчаецца, а будынак мы павінны вызваліць. Мы чакаем спецыяльную машыну, якая скульптуру транспартуе. Усё будзе ў парадку і захаванасці. Як толькі пабудуюць новы комплекс - там яе ўсталюем.

Пакуль праект на Кіжаватава не рэалізаваны, скульптуру перавозяць з сабой на новае месца. Якое - не ўдакладняюць. Вядома, што адміністрацыя пераязджае на Камуністычную, 11. На прадпрыемстве паабяцалі, што пры неабходнасці Меркурыя адновяць і адрамантуюць.

Адзначым, што ў 2015 годзе кіраўнік Мінска Андрэй Шорац казаў, што горад прапрацоўвае варыянт размяшчэння «БелЭкспа» не на Кіжаватава, а ў раёне «Экспобела».