У Горадні значна паднялі плату за карыстанне ліфтамі

У рахунках новыя сумы «схаваюць» у графу «Дадатковыя выдаткі».

Расцэнкі за паслугі ААТ «Гродналіфт» у студзені значна выраслі. Але ў рахунках новыя сумы «схаваюць» у графу «Дадатковыя выдаткі», паведамляе «Вячэрні Гродна».

Старшыні і бухгалтары кааператываў і таварыстваў уласнікаў здзіўляюцца, чаму «Гродналіфт» — фактычна адзінае ў горадзе прадпрыемства для абслугоўвання ліфтаў — раптам наважыла падняць расцэнкі. Таму што цэлы год ва ўрадзе кажуць, што выдаткі на паслугі ЖКГ трэба зніжаць.

Агулам заплацім на 50 % больш

Нядаўна ўсе ЖБВК і МС атрымалі акты аб прыёмцы выкананых работ у тэхнічным абслугоўванні ліфтаў, і там параўналі: напрыклад, у снежні дыспетчарскае абслугоўванне каштавала 11,25 рубля, цяпер — амаль 20 рублёў (на 20% даражэй). Штоквартальнае тэхнічнае абслугоўванне электрастанцый павялічылася амаль утрая. З'явілася новая паслуга (адказны за бяспечную эксплуатацыю ліфта), за якую трэба заплаціць дадаткова 9,31 рубля.

— Паводле нашых падлікаў, плата за тэхнічнае абслугоўванне ліфта павялічылася амаль на 50%. У нашым доме звычайны пасажырскі ліфт на дзесяць прыпынкаў. Калі суму, што выставіў нам «Гродналіфт», падзяліць паміж зарэгістраванымі жыхарамі, выходзіць, кожны аплатнік павінен ўнесці мінімум 1,337 рубля. Плюс паслугі адзінага інфармацыйнага разлікова-касавага цэнтра (АІРКЦ) — яшчэ 3%, — тлумачыць старшыня аднаго з МС Сяргей.

У адным таварыстве ўласнікаў на праспекце Янкі Купалы — тры дамы па 14 паверхаў, у кожным — па два ліфты: грузавы і пасажырскі. Каб цалкам кампенсаваць выдаткі на ТА, жыхары павінны плаціць паводле тарыфа не менш за 1,65 рубля, гэта значыць на 48 капеек больш, чым з дзейным тарыфам (цяпер ён у горадзе Горадні 1,19 рубля).

У сярэднім у горадзе арганізацыя павінна ўкласціся ў тарыф 1,19 рубля з аднаго аплатніка за ТА ліфтаў. Але рахункі ў ЖБВК і МС выстаўляюць у залежнасці ад канкрэтных умоў.

Напрыклад, у доме новы ліфт на аўтаматыцы і не трэба плаціць за дыягностыку — значыць, кошт будзе меншы, чым за стары ліфт з частымі аглядамі. Ці ў адным дзевяціпавярховіку на 3 пад'езды жыве ўмоўна 250 чалавек, а ў другім— амаль 330. Ці ў доме жыве шмат дзяцей да 7 гадоў, за якіх плаціць не трэба, як, напрыклад, у Альшанцы, дзе ў асноўным шматдзетныя сем'і. Або ў адным пад'ездзе можа быць адзін ліфт, а ў іншым — два. Раней у тарыф укладваліся ўсе, а цяпер розніцу павінны будуць заплаціць жыхары.

— Калі мы налічым тарыфам 1,19 рубля, а на выхадзе за тэхабслугоўванне ліфта павінны будзем заплаціць на 48 капеек больш з аднаго чалавека і не выставім жыхарам гэтую дадатковую суму, з'явіцца запазычанасць у таварыства агулам. Хто яе будзе выплачваць? Напрыклад, у нашых трох дамах з'явілася розніца 2500 рублёў за год. У нас няма датацый і субсідый, мы не зарабляем на дадатковых паслугах. Усё, што плацяць жыхары, мы аддаём. Атрымліваецца, менавіта жыхары павінны будуць аплаціць розніцу, — распавяла старшыня МС «Купалы-73» Ірына.

У рахунку ў радку «Тэхабслугоўванне ліфта» будзе паказаная сума, разлічаная паводле ільготнага тарыфу 1,19 рубля і памножаная на колькасць зарэгістраваных у кватэры жыхароў. Астатняе «запішуць» у радку «Дадатковыя выдаткі».

Расцэнкі паднялі, каб кампенсаваць выдаткі

У ААТ «Гродналіфт» адказалі, што расцэнкі не падымалі з 2013 года, а выдаткі павялічыліся.

— Павысіліся кошты арэнды дыспетчарскіх пунктаў, кабельных ліній — раней гэтыя паслугі былі бясплатныя. У адной з паслуг мы знізілі плату, у іншых — павялічылі ў сярэднім на 20%, але ў тарыф на аднаго пражываючага 1,19 рубля мы ўкладваем, — растлумачыў начальнік Гарадзенскага ліфтавага ўчастка ААТ «Гродналіфт» Генадзь Бялоцкі.

Расцэнкі на ТА ліфта адрозніваюцца толькі ў залежнасці ад узросту ліфта: тэхабслугоўванне кабін, якім больш за дзесяць гадоў, даражэйшае прыкладна на 7-8%.

— З нядаўняга часу ў кожнай арганізацыі павінен быць адказны за бяспечную эксплуатацыю ліфта. Гэта чалавек з адпаведнай адукацыяй, які прайшоў навучанне, — дадаў Генадзь Бялоцкі.

Хто не плаціць за ліфт

Не трэба плаціць за тэхабслугоўванне ліфта тым, хто жыве на першых паверхах, дзецям да сямі гадоў і жыхарам, якія паводле стану здароўя не могуць карыстацца ліфтам. Астатнія плацяць паводле тарыфа 1,19 рубля (з аднаго зарэгістраванага), на поўныя выдаткі — 1,20 рубля (з аднаго зарэгістраванага).