Прафсаюз РЭП патрабуе прызнаць дэкрэт аб «дармаедах» антыканстытуцыйным

Актывісты прафсаюза пачалі збор подпісаў пад зваротам у Канстытуцыйны суд.

Беларускі прафсаюз работнікаў радыёэлектроннай прамысловасці (РЭП) заклікаў адправіць індывідуальны зварот у Канстытуцыйны Суд Рэспублікі Беларусь (артыкулы 158-160 Закона «Аб канстытуцыйным судаводстве»).

Збор подпісаў адбываецца на сайце zvarot.by.

«Права афіцыйнага тлумачэння і скасаванне дэкрэту мае толькі той, хто яго выдаў – Лукашэнка. Але пасля таго, як яго адміністрацыя адмовілася ад канструктыўнага дыялогу аб дэкрэце і адказала на нашы больш чым 23000 подпісаў з патрабаваннем скасавання дэкрэту №3 фармальнай адпіскай, нам застаецца толькі звярнуцца ў Канстытуцыйны Суд, каб ён прызнаў дэкрэт №3 неканстытуцыйным, што пацягне за сабой ягонае скасаванне.

Дэкрэт №3 парушае два артыкулы Канстытуцыі Рэспублікі Беларусь:

— арт. 56 (грамадзяне Рэспублікі Беларусь абавязаны прымаць удзел у фінансаванні дзяржаўных расходаў шляхам выплаты дзяржаўных падаткаў, мытаў і іншых плацяжоў).

Кожны з нас, фінансуе дзяржаву, аплачваючы шматлікія мыты, зборы і ўскосныя падаткі.

Няма ніякага абгрунтаванага Канстытуцыяй і законамі нашай краіны права прымушаць нас да дадатковых выплат, адвольна выбіраючы групы асоб, нібыта якія не ўдзельнічаюць у дзяржаўным фінансаванні.

— арт 104 (закон не мае зваротнай сілы, за выключэннем выпадкаў, калі ён змякчае або скасоўвае адказнасць грамадзян).

Дэкрэт №3 прыняты 02.04.2015, а дзейнічаць ён пачаў з 01.01.2015 (!).

Так як дадатковыя выплаты, відавочна, не паляпшаюць становішча грамадзян, Дэкрэт парушае арт. 104 Канстытуцыі, надаючы сабе зваротную сілу (пачаў дзейнічаць раней, чым быў прыняты).

У індывідуальным звароце мы просім Канстытуцыйны Суд распачаць паводле гэтага звароту справу аб прызнанні дэкрэту №3 супярэчным артыкулам 56 і 104 Канстытуцыі Рэспублікі Беларусь».